అన్తఃకరణాదిషు అధ్యస్యతీతి భాష్యగతాదిశబ్దో విరుద్ధ ఇతి చోదయతి -

నన్వితి ।

అన్తఃకరణస్యైవ అధ్యాసాదేవ భాష్యే ధర్మశబ్ద ఉక్త ఇత్యర్థః ।

అన్యథేతి ।

శుద్ధచైతన్యస్యాధ్యాసే సతీత్యర్థః ।

అన్తఃకరణస్య దేహాదిషు ఆత్మాధ్యాసోపాధితయా అనుప్రవేశమాత్రమేవ । న తు తస్యాధ్యస్తత్వమిత్యాహ -

సత్యమాహ భవానితి ।

అన్తఃకరణం సచితికమన్యత్ర దేహాదిషు అధ్యస్యమానం యత్ర దేహాదిష్వధ్యస్యతే తస్యైవ దేహాదేరాత్మనః ఆత్మానం ప్రతి కార్యకరత్వమ్ ఆపాద్య అన్తఃకరణం స్వసంశ్లేషాత్ చైతన్యచ్ఛాయాభాజనయోగ్యతాం దేహాదేరాపాద్య స్వయమవిద్యమానమివ తిరస్కృతం తిష్ఠతీతి యోజనా ।

స్వతః పరతో వేతి ।

అన్తఃకరణే స్వతోఽధ్యస్యతే దేహాదిష్వన్తఃకరణోపాధిమపేక్ష్య అధ్యస్యత ఇతి చైతన్యస్యైవ సర్వత్రాధ్యాస ఇత్యత్ర స విశేష ఇత్యర్థః ।

తేనోచ్యత ఇతి ।

ఆదిశబ్ద ఉచ్యత ఇత్యర్థః ।

అత ఎవేతి ।

సర్వత్ర చైతన్యస్యైవ అధ్యాసాదేవేత్యర్థః ।

అహఙ్కర్తృత్వం యోజయన్త ఇతి ।

అహంప్రత్యయవిషయత్వమ్ ఆత్మత్వం చ యోజయన్త ఇత్యర్థః । నిగమయతీతి లక్షణాదిభిః సాధితమధ్యాసం నిగమయతీత్యర్థః ।

తత్రాపీతి ।

ప్రత్యగాత్మని నైసర్గికత్వేన ప్రథమభాష్యే యో లోకవ్యవహార ఉక్తః, స ఇహోక్తప్రత్యగాత్మని అహఙ్కారాద్యధ్యాస ఎవేత్యర్థః ।

నైసర్గికస్యేతి ।

ఆత్మభావే యో న బుధ్యతే ఎవ ? స నైసర్గికః, తస్యేత్యర్థః ।