నను భవేదనాదిః, అనన్తః కథమ్ ? యది స్యాత్తత్ప్రహాణాయ కథం వేదాన్తా ఆరభ్యన్తే ? అన్తవత్త్వేఽపి తర్హి కథమ్ ? స్వతోఽన్యతో వా తత్సిద్ధేః । తస్మాత్ అనన్తస్య ప్రహాణాయ వేదాన్తా ఆరభ్యన్తే ఇత్యుక్తే, అర్థాదేష ఎవ ప్రహాణహేతుః, అసత్యస్మిన్ అనన్తః ఇతి నిశ్చీయతే ।
‘మిథ్యాప్రత్యయరూప’
ఇతి రూపగ్రహణం లక్షణతస్తథా రూప్యతే, న వ్యవహారతః ఇతి దర్శయితుమ్ ।
‘కర్తృత్వభోక్తృత్వప్రవర్తకః’
ఇతి అనర్థహేతుత్వం దర్శయతి హేయతాసిద్ధయే । తేన కర్తృర్భోక్తుశ్చ సతో మిథ్యాజ్ఞానం దోషప్రవర్తనమితి యేషాం మతం, తన్నిరాకృతం భవతి ।
సర్వలోకప్రత్యక్షః ఇతి
‘దేహేన్ద్రియాదిష్వహంమమాభిమానహీనస్యే’త్యుపన్యస్య‘నహీన్ద్రియాణ్యనుపాదాయే’త్యాదినా యోఽనుభవో మిథ్యాత్వసిద్ధయే అనుసృతః తం నిగమయతి ॥
అనన్తః కథమితి ।
జ్ఞాననివర్త్యత్వాదితి భావః ।
యది స్యాదితి ।
అభావవిలక్షణత్వే సతి అనాదిత్వాదాత్మవదనన్తశ్చేదిత్యర్థః ।
మిథ్యాప్రత్యయరూప ఇత్యత్ర మిథ్యాప్రత్యయసదృశః, న తు మిథ్యేత్యుచ్యత ఇతి శఙ్కానిరాసార్థమాహ –
రూపగ్రహణమితి ।
తేనేతి కర్తృత్వభోక్తృత్వశక్తేరప్యధ్యాసహేతుకత్వేనేత్యర్థః ।
కర్తుర్భోక్తుశ్చ సత ఇతి ।
స్వత ఎవ కర్తృత్వాదిశక్తిమత ఇత్యర్థః ।
దోషప్రవర్తనమితి ।
రాగద్వేషజననేన ప్రవృత్తికారణమిత్యర్థః ।
యేషామితి ।
సాఙ్ఖ్యవ్యతిరిక్తానామిత్యర్థః ।
మిథ్యాత్వసిద్ధయ ఇతి ।
అహంమమాభిమానాఖ్యాధ్యాససిద్ధయ ఇత్యర్థః ।