ನನು ಭವೇದನಾದಿಃ, ಅನಂತಃ ಕಥಮ್ ? ಯದಿ ಸ್ಯಾತ್ತತ್ಪ್ರಹಾಣಾಯ ಕಥಂ ವೇದಾಂತಾ ಆರಭ್ಯಂತೇ ? ಅಂತವತ್ತ್ವೇಽಪಿ ತರ್ಹಿ ಕಥಮ್ ? ಸ್ವತೋಽನ್ಯತೋ ವಾ ತತ್ಸಿದ್ಧೇಃ । ತಸ್ಮಾತ್ ಅನಂತಸ್ಯ ಪ್ರಹಾಣಾಯ ವೇದಾಂತಾ ಆರಭ್ಯಂತೇ ಇತ್ಯುಕ್ತೇ, ಅರ್ಥಾದೇಷ ಏವ ಪ್ರಹಾಣಹೇತುಃ, ಅಸತ್ಯಸ್ಮಿನ್ ಅನಂತಃ ಇತಿ ನಿಶ್ಚೀಯತೇ ।
‘ಮಿಥ್ಯಾಪ್ರತ್ಯಯರೂಪ’
ಇತಿ ರೂಪಗ್ರಹಣಂ ಲಕ್ಷಣತಸ್ತಥಾ ರೂಪ್ಯತೇ, ನ ವ್ಯವಹಾರತಃ ಇತಿ ದರ್ಶಯಿತುಮ್ ।
‘ಕರ್ತೃತ್ವಭೋಕ್ತೃತ್ವಪ್ರವರ್ತಕಃ’
ಇತಿ ಅನರ್ಥಹೇತುತ್ವಂ ದರ್ಶಯತಿ ಹೇಯತಾಸಿದ್ಧಯೇ । ತೇನ ಕರ್ತೃರ್ಭೋಕ್ತುಶ್ಚ ಸತೋ ಮಿಥ್ಯಾಜ್ಞಾನಂ ದೋಷಪ್ರವರ್ತನಮಿತಿ ಯೇಷಾಂ ಮತಂ, ತನ್ನಿರಾಕೃತಂ ಭವತಿ ।
ಸರ್ವಲೋಕಪ್ರತ್ಯಕ್ಷಃ ಇತಿ
‘ದೇಹೇಂದ್ರಿಯಾದಿಷ್ವಹಂಮಮಾಭಿಮಾನಹೀನಸ್ಯೇ’ತ್ಯುಪನ್ಯಸ್ಯ‘ನಹೀಂದ್ರಿಯಾಣ್ಯನುಪಾದಾಯೇ’ತ್ಯಾದಿನಾ ಯೋಽನುಭವೋ ಮಿಥ್ಯಾತ್ವಸಿದ್ಧಯೇ ಅನುಸೃತಃ ತಂ ನಿಗಮಯತಿ ॥
ಅನಂತಃ ಕಥಮಿತಿ ।
ಜ್ಞಾನನಿವರ್ತ್ಯತ್ವಾದಿತಿ ಭಾವಃ ।
ಯದಿ ಸ್ಯಾದಿತಿ ।
ಅಭಾವವಿಲಕ್ಷಣತ್ವೇ ಸತಿ ಅನಾದಿತ್ವಾದಾತ್ಮವದನಂತಶ್ಚೇದಿತ್ಯರ್ಥಃ ।
ಮಿಥ್ಯಾಪ್ರತ್ಯಯರೂಪ ಇತ್ಯತ್ರ ಮಿಥ್ಯಾಪ್ರತ್ಯಯಸದೃಶಃ, ನ ತು ಮಿಥ್ಯೇತ್ಯುಚ್ಯತ ಇತಿ ಶಂಕಾನಿರಾಸಾರ್ಥಮಾಹ –
ರೂಪಗ್ರಹಣಮಿತಿ ।
ತೇನೇತಿ ಕರ್ತೃತ್ವಭೋಕ್ತೃತ್ವಶಕ್ತೇರಪ್ಯಧ್ಯಾಸಹೇತುಕತ್ವೇನೇತ್ಯರ್ಥಃ ।
ಕರ್ತುರ್ಭೋಕ್ತುಶ್ಚ ಸತ ಇತಿ ।
ಸ್ವತ ಏವ ಕರ್ತೃತ್ವಾದಿಶಕ್ತಿಮತ ಇತ್ಯರ್ಥಃ ।
ದೋಷಪ್ರವರ್ತನಮಿತಿ ।
ರಾಗದ್ವೇಷಜನನೇನ ಪ್ರವೃತ್ತಿಕಾರಣಮಿತ್ಯರ್ಥಃ ।
ಯೇಷಾಮಿತಿ ।
ಸಾಂಖ್ಯವ್ಯತಿರಿಕ್ತಾನಾಮಿತ್ಯರ್ಥಃ ।
ಮಿಥ್ಯಾತ್ವಸಿದ್ಧಯ ಇತಿ ।
ಅಹಂಮಮಾಭಿಮಾನಾಖ್ಯಾಧ್ಯಾಸಸಿದ್ಧಯ ಇತ್ಯರ್ಥಃ ।