அபரே புநரேவமாரப⁴ந்தே — ப்³ரஹ்மணி ப்ரத்யக்ஷாதி³ப்ரத்யயாந்தராணாமஸம்ப⁴வாத் பரிநிஷ்பந்நே வஸ்துநி ப்ரதிபத்திஹேதுதயா ஸம்பா⁴விதஸாமர்த்²யாநாமபி ஆம்நாயஸ்ய புந: கார்யவிஷயதயா ஸுதராமஸம்ப⁴வம் மந்வாநஸ்ய ப⁴வதி ஸங்கர்ஷபர்யந்தே ஏவ வேதா³ர்த²விசாராவஸாநாமிதி பு³த்³தி⁴:, தந்நிராஸார்த²ம் புந: ப்ரதிஜ்ஞாதம் । இஹாபி ஸர்வேஷ்வேவாத்மஜ்ஞாநவிதா⁴நேஷு கார்யநிஷ்ட²தாம் வர்ணயந்தி ஸமாம் । தத்த்வாவபோ³த⁴ஶ்ச கார்யம் ; அதி⁴காரிநியோக³விஷயதயா அவக³மாத் இதி ; தத: தத்³விசாரார்த²ம் ஶாஸ்த்ரமாரப்³த⁴வ்யமிதி ॥
ப்³ரஹ்மணி ப்ரமாணாபா⁴வாதே³வ தஸ்யாபா⁴வாத் ந தத்³விசாராய ஶாஸ்த்ரமாரப்³த⁴வ்யமிதி । த்³விதீயாரம்ப⁴வாதி³நோ வ்யாவர்த்யஶங்காமாஹ -
ப்³ரஹ்மணி ப்ரத்யயாந்தராணாமிதி ।
கார்யவிஷயதயா ஸுதராமிதி ।
ஆம்நாயஸ்ய கார்யநிஷ்ட²த்வாத் ப்³ரஹ்மநிஷ்ட²த்வே(அ)பி தஸ்மிந் யோக்³யப்ரமாணாந்தராஸம்ப⁴வாத் ஸ்பர்ஶகோ³சரசாக்ஷுஷசித்ரநிம்நோந்நதாதி³வத் ப்³ரஹ்மவஸ்த்வபா⁴வாத் ந தத்ர ப்ராமாண்யஸித்³தி⁴ரித்யர்த²: । ஸங்கர்ஷபர்யந்த இதி கர்மகாண்ட³ம் தே³வதாகாண்ட³ம் ப்³ரஹ்மகாண்ட³மிதி காண்ட³த்ரயாத்மிகாயாம் மீமாம்ஸாயாம் ஸங்கர்ஷாக்²யதே³வதாகாண்டா³வஸாநே வேதா³ர்த²விசாரஸ்ய ஸமாப்தி: (ஸ்யாத்)ப்³ரஹ்மணோ அபா⁴வாதி³தி பு³த்³தி⁴: ஸ்யாதி³த்யர்த²: ।
தந்நிராஸார்த²மிதி ।
வேதா³ந்தேஷு விதி⁴ரஸ்தி । ஸ ச விதி⁴: ஆத்மமாத்ரஜ்ஞாநஸ்ய நித்யப்ராப்தத்வே(அ)பி ஆத்மதயா ப்³ரஹ்மண: அவபோ³தே⁴ ஸம்ப⁴வதி । அதோ விதௌ⁴ மஹாதாத்பர்யே(அ)பி வித்⁴யாகாங்க்ஷிதப்³ரஹ்மண்யபி அவாந்தரதாத்பர்யமஸ்தி । அதோ ப்³ரஹ்மண: ஸத்³பா⁴வாத் தத்ப்ரதிபத்திவித்⁴யோஶ்ச ஸம்ப⁴வாத் விதி⁴ஶேஷப்³ரஹ்மவிசாராய புந: ப்ரதிஜ்ஞாதமித்யர்த²: ।
ப்³ரஹ்மணோ நாஸ்தித்வமாஶங்க்ய ஸமாதா⁴நம் க்ரியதே சேத் ஸித்³தா⁴ந்தாத் கோ விஶேஷ இதி தத்ராஹ -
இஹாபீதி ।
த்³விதீயாரம்ப⁴வாதி³மதே(அ)பீத்யர்த²: ।
ஆத்மஜ்ஞாநவிதா⁴நேஷ்விதி ।
ஆத்மப்ரதிபாத³கவேதா³ந்தவாக்யேஷ்வித்யர்த²: ।
ஸமாமிதி ।
கர்மபா⁴கே³ந ஸமாமித்யர்த²: ।
நித்யப்ராப்தமஹமித்யாத்மமாத்ரஜ்ஞாநம் ந விதே⁴யமிதி । ஸத்யம் । ந தஸ்ய விதி⁴ரித்யாஹ -
தத்வாவபோ³த⁴ஶ்சேதி ।
அதி⁴காரநியோக³விஷயதயேதி ।
‘தரதி ஶோகமாத்மவித்சா²0 7 - 1 - 3’ ‘ப்³ரஹ்ம வேத³ ப்³ரஹ்மைவ ப⁴வதிமு0 3 - 2 - 9’ இத்யாதி³வாக்யேஷு ஜ்ஞாநஸ்ய ப²லஸம்ப³ந்தோ⁴ க³ம்யதே । தத்ப²லகாமிநா ஜ்ஞாநமநுஷ்டே²யம் நியோகா³ச்சாநுஷ்டா²நமிதி இஷ்டப²லகாமிநியோக³விஷயதயா அவக³மாதி³தி பா⁴வ: । தத்³விசாரார்த²ம் ; விதி⁴ஶேஷப்³ரஹ்மவிசாரார்த²மித்யர்த²: ।