విషయసమ్భవాసమ్భవాభ్యాం అధికరణమారచయితుం పూర్వోక్తం స్మారయతి –

విచారస్యేతి ।

గతార్థత్వేతి ।

శ్రీభగవతా జైమినినా విచారితార్థకత్వం గతార్థత్వమిత్యర్థః ।

విధేశ్చేతి ।

సచ్చిదానన్దాత్మకో జీవస్తత్కృతం కర్మేతి కర్మమాహాత్మ్యం కిం వక్తవ్యమ్ ఇతి కర్మస్తావకత్వేన సర్వేషాం వేదాన్తానామర్థవాదత్వం జీవస్య తు సచ్చిదానన్దాత్మకత్వమవాస్తవం కిన్తు స్తోత్రార్థమిత్యేవం పూర్వతన్త్రవిచార ఎవ విచారితత్వాదవగతార్థా ఎవ వేదాన్తా ఇతి భావః ।

ఫలితమాహ –

ఇత్యవ్యవహితేతి ।

ఇతి పదం హేత్వర్థకమ్ అవ్యవహితస్య పూర్వతన్త్రావిచారితత్వేన బుద్ధిస్థస్య ప్రతిపాద్యస్యాభావాదిత్యర్థః । పూర్వతన్త్రే విచారితత్వాద్వేదాన్తానాం కేనాపి తన్త్రేణావిచారితం సద్బుద్ధివిషయః కిఞ్చిత్ప్రతిపాద్యం వస్తు నాస్తీతి భావః । విచారస్య పూజితత్వం సర్వవిచారాపేక్షయోత్కృష్టత్వమ్ ।

శాస్త్రమేవ విశినష్టి –

సూత్రసన్దర్భస్యేతి ।

సూత్రకర్తుః శ్రీవేదవ్యాసస్య భ్రాన్తిం వారయతి –

సర్వజ్ఞ ఇతి ।

బాదరాయణశబ్దో వ్యాఖ్యాతః । యది విధిరేవ వేదార్థః స్యాత్తదా విధివిచారేణ కృత్స్నవేదవిచారో జాత ఎవేతి వేదాన్తానామర్థవాదత్వేన బ్రహ్మప్రతిపాదకత్వాభావాద్బ్రహ్మణి ప్రమాణాభావేన ప్రథమసూత్రే బ్రహ్మణః జిజ్ఞాస్యత్వోక్తేర్వైయర్థ్యం స్యాదితి భావః ।

అతఃశబ్దార్థం కథయన్ఫలితమాహ –

అత ఇతి ।

అనవగతమ్ అవిచారితత్వేనాజ్ఞాతం యద్బ్రహ్మ తదేవ పరం ప్రధానం యస్య వేదాన్తస్య స బ్రహ్మపరః స చాసౌ వేదాన్తశ్చ తస్య విచార ఇతి విగ్రహః ।

స్వోక్తేఽర్థే శ్రీభాష్యకారసమ్మతిమాహ -

తచ్చేతి ।

ఆరమ్భణీయత్వమిత్యర్థః ।