ಪ್ರಕಾರಾಂತರೇಣ ಪ್ರಾಣಸ್ಯ ಸಾಮತ್ವಮುಪಾಸನಾರ್ಥಮುಪನ್ಯಸ್ಯತಿ —
ಯದಿತ್ಯಾದಿನಾ ।
ಪ್ರಕಾರಾಂತರದ್ಯೋತೀ ವಾಶಬ್ದೋಽತ್ರ ನ ಶ್ರೂಯತ ಇತ್ಯಾಶಂಕ್ಯಾಽಽಹ —
ವಾಶಬ್ದ ಇತಿ ।
ನಿಮಿತ್ತಾಂತರಮೇವ ಪ್ರಶ್ನಪೂರ್ವಕಂ ಪ್ರಕಟಯತಿ —
ಕೇನೇತ್ಯಾದಿನಾ ।
ನನು ಪ್ರಾಣಸ್ಯ ತತ್ತಚ್ಛರೀರಪರಿಮಾಣತ್ವೇ ಪರಿಚ್ಛಿನ್ನತ್ವಾದಾನಂತ್ಯಾನುಪಪತ್ತಿಸ್ತತ್ಕಥಮಸ್ಯ ವಿರುದ್ಧೇಷು ಶರೀರೇಷು ಸಮತ್ವಮಿತ್ಯಾಶಂಕ್ಯಾಽಽಹ —
ಪುತ್ತಿಕಾದೀತಿ ।
ಸಮಶಬ್ದಸ್ಯ ಯಥಾಶ್ರುತಾರ್ಥತ್ವಂ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ನ ಪುನರಿತಿ ।
ಆಧಿದೈವಿಕೇನ ರೂಪೇಣಾಮೂರ್ತತ್ವಂ ಸರ್ವಗತತ್ವಂ ಚ ದ್ರಷ್ಟವ್ಯಮ್ ।
ನನು ಪ್ರದೀಪೋ ಘಟೇ ಸಂಕುಚತಿ ಪ್ರಾಸಾದೇ ಚ ವಿಕಸತಿ ತಥಾ ಪ್ರಾಣೋಽಪಿ ಮಶಕಾದಿಶರೀರೇಷು ಸಂಕೋಚಮಿಭಾದಿದೇಹೇಷು ವಿಕಾಸಂ ಚಾಽಽಪದ್ಯತಾಮಿತಿ ಸಮತ್ವಾಸಿದ್ಧಿರಿತ್ಯಾಶಂಕ್ಯಾಽಽಹ —
ನ ಚೇತಿ ।
ಪ್ರಾಣಸ್ಯ ಸರ್ವಗತತ್ವೇ ಸಮತ್ವಶ್ರುತಿವಿರೋಧಮಾಶಂಕ್ಯಾಽಽಹ —
ಸರ್ವಗತಸ್ಯೇತಿ ।
ಖಂಡಾದಿಷು ಗೋತ್ವವಚ್ಛರೀರೇಷು ಸರ್ವತ್ರ ಸ್ಥಿತಸ್ಯ ಪ್ರಾಣಸ್ಯ ತತ್ತಚ್ಛರೀರಪರಿಮಾಣಾಯಾ ವೃತ್ತೇರ್ಲಾಭಃ । ಸಂಭವತಿ ಸರ್ವಗತಸ್ಯೈವ ನಭಸಸ್ತತ್ರ ತತ್ರ ಕೂಪಕುಂಭಾದ್ಯವಚ್ಛೇದೋಪಲಂಭಾದಿತ್ಯರ್ಥಃ ।
ಫಲಶ್ರುತಿಮವತಾರ್ಯ ವ್ಯಾಕರೋತಿ —
ಏವಮಿತಿ ।
ಫಲವಿಕಲ್ಪೇ ಹೇತುಮಾಹ —
ಭಾವನೇತಿ ।
ವೇದನಂ ವ್ಯಾಕರೋತಿ —
ಆ ಪ್ರಾಣೇತಿ ।
ಇದಂಚ ಫಲಂ ಮಧ್ಯಪ್ರದೀಪನ್ಯಾಯೇನೋಭಯತಃ ಸಂಬಂಧಮವಧೇಯಮ್ ॥೨೨॥