ಪರಸ್ಯ ಪ್ರವೇಶೇ ಪ್ರಾಪ್ತಾಂ ದೋಷಪರಂಪರಾಂ ಪರಾಕೃತ್ಯ ತತ್ಪ್ರವೇಶಸ್ವರೂಪಂ ನಿರೂಪಯತಿ —
ಜಲೇತಿ ।
ಯಥಾ ಜಲೇ ಸೂರ್ಯಾದೇಃ ಪ್ರತಿಬಿಂಬಲಕ್ಷಣಃ ಪ್ರವೇಶೋ ದೃಶ್ಯತೇ ತಥಾಽಽತ್ಮನೋಽಪಿ ಸೃಷ್ಟೇ ಕಾರ್ಯೇ ಕಾಲ್ಪನಿಕಃ ಪ್ರವೇಶ ಇತ್ಯರ್ಥಃ ।
ಅನವಚ್ಛಿನ್ನಾದ್ವಯಚಿದ್ಧಾತೋರ್ವಸ್ತ್ವಂತರೇಣ ಸನ್ನಿಕರ್ಷಾಸಂಭವಾನ್ನ ಪ್ರತಿಬಿಂಬಾಖ್ಯಪ್ರವೇಶಃ ಸಂಭವತೀತ್ಯಾಶಂಕ್ಯ ವಸ್ತ್ವಂತರಕಲ್ಪನಯಾ ಕಲ್ಪಿತಸನ್ನಿಕರ್ಷಾದ್ಯಾದಾಯ ಪ್ರತಿಬಿಂಬಪಕ್ಷಂ ಸಾಧಯತಿ —
ಆತ್ಮೇತಿ ।
ತದೇವ ಪ್ರಪಂಚಯತಿ —
ಪ್ರಾಗುತ್ಪತ್ತೇರಿತ್ಯಾದಿನಾ ।
ಸ್ವಾಭಿಪ್ರೇತಂ ಪ್ರವೇಶಂ ಪ್ರತಿಪಾದ್ಯ ಪರೇಷ್ಟಂ ಪರಾಚಷ್ಟೇ —
ನ ತ್ವಿತಿ ।
ಕುತಶ್ಚಿದ್ದಿಶೋ ದೇಶಾತ್ಕಾಲಾಚ್ಚಾಪಕ್ರಮಣೇನ ದಿಗಂತರೇ ದೇಶಾಂತರೇ ಕಾಲಾಂತರೇ ಚ ಪ್ರಾಪ್ತಿಲಕ್ಷಣ ಇತಿ ಯಾವತ್ ।
ಯತ್ತು ಪರಸ್ಮಾದನ್ಯಸ್ಯ ಪ್ರವೇಷ್ಟೃತ್ವಮಿತಿ ತತ್ರಾಽಽಹ —
ನ ಚೇತಿ ।
ಅಥೇದಂ ಪ್ರವೇಶಾದಿ ವಸ್ತುತೋ ವಿದ್ಯಮಾನಮಸ್ತು ಕಿಮಿತ್ಯಾವಿದ್ಯಂ ಕಲ್ಪ್ಯತೇ ತತ್ರಾಽಽಹ —
ಉಪಲಬ್ಧೀತಿ ।
ಆತ್ಮಜ್ಞಾನಾರ್ಥತ್ವೇನ ಪ್ರವೇಶಾದೀನಾಂ ಕಲ್ಪಿತತ್ವಾತ್ತದ್ವಾಕ್ಯಾನಾಂ ನ ಸ್ವಾರ್ಥೇ ಪರ್ಯವಸಾನಮಿತ್ಯರ್ಥಃ ।
ಫಲವತ್ಸನ್ನಿಧಾವಫಲಂ ತದಂಗಮಿತಿ ನ್ಯಾಯಮಾಶ್ರಿತ್ಯೋಕ್ತಮೇವ ಪ್ರಪಂಚಯತಿ —
ಉಪಲಬ್ಧೇರಿತ್ಯಾದಿನಾ ।
ತತಃಶಬ್ದೋ ಭಕ್ತಿಯೋಗಪರಾಮರ್ಶೀ । ತದಿತ್ಯಾತ್ಮಜ್ಞಾನಮುಚ್ಯತೇ ।
ತಸ್ಯಾಗ್ರ್ಯತ್ವಂ ಸಾಧಯತಿ —
ಪ್ರಾಪ್ಯತೇ ಹೀತಿ ।
ಸೃಷ್ಟ್ಯಾದಿವಾಕ್ಯಾನಾಮೈಕ್ಯಜ್ಞಾನಾರ್ಥತ್ವೇ ಹೇತ್ವಂತರಮಾಹ —
ಭೇದೇತಿ ।
ಕಲ್ಪಿತಂ ಪ್ರವೇಶಂ ಪ್ರತಿಪಾದಿತಮುಪಸಂಹರತಿ —
ತಸ್ಮಾದಿತಿ ।