பரஸ்ய ப்ரவேஶே ப்ராப்தாம் தோ³ஷபரம்பராம் பராக்ருத்ய தத்ப்ரவேஶஸ்வரூபம் நிரூபயதி —
ஜலேதி ।
யதா² ஜலே ஸூர்யாதே³: ப்ரதிபி³ம்ப³லக்ஷண: ப்ரவேஶோ த்³ருஶ்யதே ததா²(அ)(அ)த்மநோ(அ)பி ஸ்ருஷ்டே கார்யே கால்பநிக: ப்ரவேஶ இத்யர்த²: ।
அநவச்சி²ந்நாத்³வயசித்³தா⁴தோர்வஸ்த்வந்தரேண ஸந்நிகர்ஷாஸம்ப⁴வாந்ந ப்ரதிபி³ம்பா³க்²யப்ரவேஶ: ஸம்ப⁴வதீத்யாஶங்க்ய வஸ்த்வந்தரகல்பநயா கல்பிதஸந்நிகர்ஷாத்³யாதா³ய ப்ரதிபி³ம்ப³பக்ஷம் ஸாத⁴யதி —
ஆத்மேதி ।
ததே³வ ப்ரபஞ்சயதி —
ப்ராகு³த்பத்தேரித்யாதி³நா ।
ஸ்வாபி⁴ப்ரேதம் ப்ரவேஶம் ப்ரதிபாத்³ய பரேஷ்டம் பராசஷ்டே —
ந த்விதி ।
குதஶ்சித்³தி³ஶோ தே³ஶாத்காலாச்சாபக்ரமணேந தி³க³ந்தரே தே³ஶாந்தரே காலாந்தரே ச ப்ராப்திலக்ஷண இதி யாவத் ।
யத்து பரஸ்மாத³ந்யஸ்ய ப்ரவேஷ்ட்ருத்வமிதி தத்ரா(அ)(அ)ஹ —
ந சேதி ।
அதே²த³ம் ப்ரவேஶாதி³ வஸ்துதோ வித்³யமாநமஸ்து கிமித்யாவித்³யம் கல்ப்யதே தத்ரா(அ)(அ)ஹ —
உபலப்³தீ⁴தி ।
ஆத்மஜ்ஞாநார்த²த்வேந ப்ரவேஶாதீ³நாம் கல்பிதத்வாத்தத்³வாக்யாநாம் ந ஸ்வார்தே² பர்யவஸாநமித்யர்த²: ।
ப²லவத்ஸந்நிதா⁴வப²லம் தத³ங்க³மிதி ந்யாயமாஶ்ரித்யோக்தமேவ ப்ரபஞ்சயதி —
உபலப்³தே⁴ரித்யாதி³நா ।
தத:ஶப்³தோ³ ப⁴க்தியோக³பராமர்ஶீ । ததி³த்யாத்மஜ்ஞாநமுச்யதே ।
தஸ்யாக்³ர்யத்வம் ஸாத⁴யதி —
ப்ராப்யதே ஹீதி ।
ஸ்ருஷ்ட்யாதி³வாக்யாநாமைக்யஜ்ஞாநார்த²த்வே ஹேத்வந்தரமாஹ —
பே⁴தே³தி ।
கல்பிதம் ப்ரவேஶம் ப்ரதிபாதி³தமுபஸம்ஹரதி —
தஸ்மாதி³தி ।