ಪ್ರಶ್ನಪ್ರತಿವಚನಯೋರನನುರೂಪತ್ವಮಾಶಂಕತೇ —
ಸ ಹೋವಾಚೇತಿ ।
ದೃಷ್ಟಾಂತಮೇವ ಸ್ಪಷ್ಟಯತಿ —
ಅಸಾವಿತ್ಯಾದಿನಾ ।
ಪ್ರತ್ಯಕ್ಷಂ ಗಾಮಶ್ವಂ ವಾ ದರ್ಶಯಾಮೀತಿ ಪೂರ್ವಂ ಪ್ರತಿಜ್ಞಾಯ ಪಶ್ಚಾದ್ಯಶ್ಚಲತ್ಯಸೌ ಗೌರ್ಯೋ ವಾ ಧಾವತಿ ಸೋಽಶ್ವ ಇತಿ ಚಲನಾದಿಲಿಂಗೈರ್ಯಥಾ ಗವಾದಿ ವ್ಯಪದಿಶತ್ಯೇವಮೇವ ಬ್ರಹ್ಮ ಪ್ರತ್ಯಕ್ಷಂ ದರ್ಶಯಾಮೀತಿ ಮತ್ಪ್ರಶ್ನಾನುಸಾರೇಣ ಪ್ರತಿಜ್ಞಾಯ ಪ್ರಾಣನಾದಿಲಿಂಗೈಸ್ತದ್ವ್ಯಪದಿಶತಸ್ತೇ ಪ್ರತಿಜ್ಞಾಹಾನಿರನವಧೇಯವಚನತಾ ಚ ಸ್ಯಾದಿತ್ಯರ್ಥಃ ।
ಪ್ರತಿಜ್ಞಾಪ್ರಶ್ನಾವನುಸರ್ತವ್ಯೌ ಬುದ್ಧಿಪೂರ್ವಕಾರಿಣೇತಿ ಫಲಿತಮಾಹ —
ಕಿಂ ಬಹುನೇತಿ ।
ಪ್ರತ್ಯುಕ್ತಿತಾತ್ಪರ್ಯಮಾಹ —
ಯಥೇತಿ ।
ಪ್ರತಿಜ್ಞಾನುವರ್ತನಮೇವಾಭಿನಯತಿ —
ತತ್ತಥೇತಿ ।
ಕತಮೋ ಯಾಜ್ಞವಲ್ಕ್ಯೇತ್ಯಾದಿಪ್ರಶ್ನಸ್ಯ ತಾತ್ಪರ್ಯಮಾಹ —
ಯತ್ಪುನರಿತಿ ।
ನ ದೃಷ್ಟೇರಿತ್ಯಾದಿವಾಕ್ಯಸ್ಯ ತಾತ್ಪರ್ಯಂ ವದನ್ನುತ್ತರಮಾಹ —
ತದಶಕ್ಯತ್ವಾದಿತಿ ।
ಆತ್ಮನೋ ವಸ್ತುತ್ವಾದ್ಘಟಾದಿವದ್ವಿಷಯೀಕರಣಂ ನಾಶಕ್ಯಮಿತಿ ಶಂಕತೇ —
ಕಸ್ಮಾದಿತಿ ।
ವಸ್ತುಸ್ವರೂಪಮನುಸೃತ್ಯ ಪರಿಹರತಿ —
ಆಹೇತಿ ।
ಘಟಾದೇರಪಿ ತರ್ಹಿ ವಸ್ತುಸ್ವಾಭಾವ್ಯಾನ್ಮಾ ಭೂದ್ವಿಷಯೀಕರಣಮಿತಿ ಮನ್ವಾನಃ ಶಂಕತೇ —
ಕಿಂ ಪುನರಿತಿ ।
ದೃಷ್ಟ್ಯಾದಿಸಾಕ್ಷಿತ್ವಂ ವಸ್ತುಸ್ವಾಭಾವ್ಯಂ ತತಶ್ಚಾವಿಷಯತ್ವಂ ನ ಚೈವಂ ವಸ್ತುಸ್ವಾಭಾವ್ಯಂ ಘಟಾದೇರಸ್ತೀತ್ಯುತ್ತರಮಾಹ —
ದೃಷ್ಟ್ಯಾದೀತಿ ।
ದೃಟ್ಯಾದಿಸಾಕ್ಷಿಣೋಽಪಿ ದೃಷ್ಟಿವಿಷಯತ್ವಂ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ದೃಷ್ಟೇರಿತಿ ।
ಯಥಾ ಪ್ರದೀಪೋ ಲೌಕಿಕಜ್ಞಾನೇನ ಪ್ರಕಾಶ್ಯೋ ನ ಸ್ವಪ್ರಕಾಶಕಂ ಜ್ಞಾನಂ ಪ್ರಕಾಶಯತಿ ತಥಾ ದೃಷ್ಟಿಸಾಕ್ಷೀ ದೃಷ್ಟ್ಯಾ ನ ಪ್ರಕಾಶ್ಯತ ಇತ್ಯರ್ಥಃ ।
ದೃಷ್ಟೇರ್ದ್ರಷ್ಟೈವ ನಾಸ್ತೀತಿ ಸೌಗತಾಸ್ತಾನ್ಪ್ರತ್ಯಾಹ —
ದೃಷ್ಟಿರಿತೀತಿ ।
ಲೌಕಿಕೀಂ ವ್ಯಾಚಷ್ಟೇ —
ತತ್ರೇತಿ ।
ಪಾರಮಾರ್ಥಿಕೀಂ ದೃಷ್ಟಿಂ ವ್ಯಾಕರೋತಿ —
ಯಾ ತ್ವಿತಿ ।
ನನ್ವಾತ್ಮಾ ನಿತ್ಯದೃಷ್ಟಿಸ್ವಭಾವಶ್ಚೇತ್ಕಥಂ ದ್ರಷ್ಟೇತ್ಯಾದಿವ್ಯಪದೇಶಃ ಸಿಧ್ಯತಿ ತತ್ರಾಽಽಹ —
ಸಾ ಕ್ರಿಯಮಾಣಯೇತಿ ।
ಸಾಕ್ಷ್ಯಬುದ್ಧಿತದ್ವೃತ್ತಿಗತಂ ಕರ್ತೃತ್ವಂ ಕ್ರಿಯಾತ್ವಂ ಚಾಽಽಧ್ಯಾಸಿಕಂ ನಿತ್ಯದೃಗ್ರೂಪೇ ವ್ಯವಹ್ರಿಯತ ಇತ್ಯರ್ಥಃ ।
ಆತ್ಮನೋ ನಿತ್ಯದೃಷ್ಟಿಸ್ವಭಾವತ್ವೇ ಕಥಂ ‘ಪಶ್ಯತಿ ನ ಪಶ್ಯತಿ ಚೇ’ತಿ ಕಾದಾಚಿತ್ಕೋ ವ್ಯವಹಾರ ಇತ್ಯಾಶಂಕ್ಯಾಽಽಹ —
ಯಾಽಸಾವಿತಿ ।
ಯಾ ಬಹುವಿಶೇಷಣಾ ಲೌಕಿಕೀ ದೃಷ್ಟಿರಸೌ ತತ್ಪ್ರತಿಚ್ಛಾಯೇತಿ ಸಂಬಂಧಃ । ತಥಾ ಚ ಯಾ ತತ್ಪ್ರತಿಚ್ಛಾಯಾ ತಯಾ ವ್ಯಾಪ್ತೈವೇತಿ ಯಾವತ್ ।
ಕಿಮಿತ್ಯೌಪಚಾರಿಕೋ ವ್ಯಪದೇಶೋ ಮುಖ್ಯಸ್ತು ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ನ ತ್ವಿತಿ ।
ದೃಷ್ಟೇರ್ವಸ್ತುತೋ ನ ವಿಕ್ರಿಯಾವತ್ವಮಿತ್ಯತ್ರ ವಾಕ್ಯಶೇಷಮನುಕೂಲಯತಿ —
ತಥಾ ಚೇತಿ ।
ಉಕ್ತೇಽರ್ಥೇ ನ ದೃಷ್ಟೇರಿತ್ಯಾದಿಶ್ರುತಿಮವತಾರ್ಯ ವ್ಯಾಚಷ್ಟೇ —
ತಮಿಮಮಿತ್ಯಾದಿನಾ ।
ಉಕ್ತಮೇವ ಪ್ರಪಂಚಯತಿ —
ಯಾಽಸಾವಿತಿ ।
ನ ದೃಷ್ಟೇರಿತ್ಯಾದಿವಾಕ್ಯಾರ್ಥಂ ನಿಗಮಯತಿ —
ತಸ್ಮಾದಿತಿ ।
ಉಕ್ತನ್ಯಾಯಮುತ್ತರವಾಕ್ಯೇಷ್ವತಿದಿಶತಿ —
ತಥೇತಿ ।
ಉಕ್ತಂ ವಸ್ತುಸ್ವಾಭಾವ್ಯಮುಪಸಂಹೃತ್ಯ ಫಲಿತಮಾಹ —
ಏಷ ಇತಿ ।