జాగ్రత్స్వప్నయోరివ యద్విజానీయాత్ , తత్ ద్వితీయం ప్రవిభక్తమన్యత్వేన నాస్తీత్యుక్తమ్ ; అతః సుషుప్తే న విజానాతి విశేషమ్ । నను యది అస్య అయమేవ స్వభావః, కిన్నిమిత్తమ్ అస్య విశేషవిజ్ఞానం స్వభావపరిత్యాగేన ; అథ విశేషవిజ్ఞానమేవ అస్య స్వభావః, కస్మాదేష విశేషం న విజానాతీతి । ఉచ్యతే, శృణు — యత్ర యస్మిన్ జాగరితే స్వప్నే వా అన్యదివ ఆత్మనో వస్త్వన్తరమివ అవిద్యయా ప్రత్యుపస్థాపితం భవతి, తత్ర తస్మాదవిద్యాప్రత్యుపస్థాపితాత్ అన్యః అన్యమివ ఆత్మానం మన్యమానః — అసతి ఆత్మనః ప్రవిభక్తే వస్త్వన్తరే అసతి చ ఆత్మని తతః ప్రవిభక్తేః, అన్యః అన్యత్ పశ్యేత్ ఉపలభేత ; తచ్చ దర్శితం స్వప్నే ప్రత్యక్షతః — ‘ఘ్నన్తీవ జినన్తీవ’ (బృ. ఉ. ౪ । ౩ । ౨౦) ఇతి । తథా అన్యః అన్యత్ జిఘ్రేత్ రసయేత్ వదేత్ శృణుయాత్ మన్వీత స్పృశేత్ విజానీయాదితి ॥