ಆತ್ಮನಃ ಶ್ರುತ್ಯಾದಿಪ್ರಮಿತೇ ನಿತ್ಯತ್ವೇ ತದುತ್ಪತ್ತಿವಿನಾಶಪ್ರಯುಕ್ತಶೋಕಮೋಹಾಭಾವೇಽಪಿ, ಪ್ರಕಾರಾಂತರೇಣ ಶೋಕಮೋಹೌ ಸ್ಯಾತಾಮ್ ,  ಇತ್ಯಾಶಂಕಾಮನೂದ್ಯ, ಉತ್ತರತ್ವೇನ ಶ್ಲೋಕಮವತಾರಯತಿ -

ಯದ್ಯಪೀತ್ಯಾದಿನಾ ।

ಶೀತೋಷ್ಣಯೋಸ್ತಾಭ್ಯಾಂ ಸುಖದುಃಖಯೋಶ್ಚ ಪ್ರಾಪ್ತಿಂ ನಿಮಿತ್ತೀಕೃತ್ಯ ಯೋ ಮೋಹಾದಿರ್ದೃಶ್ಯತೇ, ತಸ್ಯ ಅನ್ವಯವ್ಯತಿರೇಕಾಭ್ಯಾಂ ದೃಶ್ಯಮಾನತ್ವಮಾಶ್ರಿತ್ಯ ಲೌಕಿಕವಿಶೇಷಣಮ್ । ‘ಅಶೋಚ್ಯಾನ್’ (ಭ. ಭ. ಗೀ. ೨-೧೧) ಇತ್ಯತ್ರ ಯೋ ವಿದ್ಯಾಧಿಕಾರೀ ಸೂಚಿತಃ, ತಸ್ಯ ‘ತಿತಿಕ್ಷುಃ ಸಮಾಹಿತೋ ಭೂತ್ವಾ’ (ಬೃ. ಉ. ೪-೪-೨೩) ಇತಿ ಶ್ರುತೇಸ್ತಿತಿಕ್ಷುತ್ವವಿಶೇಷಣಮಿಹೋಪದಿಶ್ಯತೇ।