ಶ್ರೀಮದ್ಭಗವದ್ಗೀತಾಭಾಷ್ಯಮ್
ದ್ವಿತೀಯೋಽಧ್ಯಾಯಃ
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಗೀತಾಭಾಷ್ಯ)
 
ಸುಖದುಃಖೇ ಸಮೇ ಕೃತ್ವಾ ಲಾಭಾಲಾಭೌ ಜಯಾಜಯೌ ।
ತತೋ ಯುದ್ಧಾಯ ಯುಜ್ಯಸ್ವ ನೈವಂ ಪಾಪಮವಾಪ್ಸ್ಯಸಿ ॥ ೩೮ ॥
ಸುಖದುಃಖೇ ಸಮೇ ತುಲ್ಯೇ ಕೃತ್ವಾ, ರಾಗದ್ವೇಷಾವಪ್ಯಕೃತ್ವೇತ್ಯೇತತ್ । ತಥಾ ಲಾಭಾಲಾಭೌ ಜಯಾಜಯೌ ಚ ಸಮೌ ಕೃತ್ವಾ ತತೋ ಯುದ್ಧಾಯ ಯುಜ್ಯಸ್ವ ಘಟಸ್ವ । ನ ಏವಂ ಯುದ್ಧಂ ಕುರ್ವನ್ ಪಾಪಮ್ ಅವಾಪ್ಸ್ಯಸಿ । ಇತ್ಯೇಷ ಉಪದೇಶಃ ಪ್ರಾಸಂಗಿಕಃ ॥ ೩೮ ॥
ಸುಖದುಃಖೇ ಸಮೇ ಕೃತ್ವಾ ಲಾಭಾಲಾಭೌ ಜಯಾಜಯೌ ।
ತತೋ ಯುದ್ಧಾಯ ಯುಜ್ಯಸ್ವ ನೈವಂ ಪಾಪಮವಾಪ್ಸ್ಯಸಿ ॥ ೩೮ ॥
ಸುಖದುಃಖೇ ಸಮೇ ತುಲ್ಯೇ ಕೃತ್ವಾ, ರಾಗದ್ವೇಷಾವಪ್ಯಕೃತ್ವೇತ್ಯೇತತ್ । ತಥಾ ಲಾಭಾಲಾಭೌ ಜಯಾಜಯೌ ಚ ಸಮೌ ಕೃತ್ವಾ ತತೋ ಯುದ್ಧಾಯ ಯುಜ್ಯಸ್ವ ಘಟಸ್ವ । ನ ಏವಂ ಯುದ್ಧಂ ಕುರ್ವನ್ ಪಾಪಮ್ ಅವಾಪ್ಸ್ಯಸಿ । ಇತ್ಯೇಷ ಉಪದೇಶಃ ಪ್ರಾಸಂಗಿಕಃ ॥ ೩೮ ॥

ಸುಹೃಂಜೀವನಮರಣಾದಿನಿಮಿತ್ತಯೋಃ ಸುಖದುಃಖಯೋಃ ಸಮತಾಕರಣಂ ಕಥಮ್ ? ಇತಿ, ತತ್ರಾಹ -

ರಾಗದ್ವೇಷಾವಿತಿ ।

ಲಾಭಃ - ಶತ್ರುಕೋಷಾದಿಪ್ರಾಪ್ತಿಃ, ಅಲಾಭಃ - ತದ್ವಿಪರ್ಯಯಃ । ನ್ಯಾಯ್ಯೇನ ಯುದ್ಧೇನಾಪರಿಭೂತೇನ ಪರಸ್ಯ ಪರಿಭವೋ ಜಯಃ, ತದ್ವಿಪರ್ಯಯಸ್ತ್ವಜಯಃ, ತಯೋರ್ಲಾಭಾಲಾಭಯೋರ್ಜಯಾಜಯಯೋಶ್ಚ ಸಮತಾಕರಣಂ ಸಮಾನಮೇವ, ರಾಗದ್ವೇಷಾವಕೃತ್ವೇತ್ಯೇತದ್ದರ್ಶಯಿತುಂ ತಥೇತ್ಯುಕ್ತಮ್ ।

ಯಥೋಕ್ತೋಪದೇಶವಶಾತ್ ಪರಮಾರ್ಥದರ್ಶನಪ್ರಕರಣೇ ಯುದ್ಧಕರ್ತವ್ಯತೋಕ್ತೇಃ ಸಮುಚ್ಚಯಪರತ್ವಂ ಶಾಸ್ತ್ರಸ್ಯ ಪ್ರಾಪ್ತಮಿತ್ಯಾಶಂಕ್ಯಾಹ -

ಏಷ ಇತಿ ।

ಕ್ಷತ್ರಿಯಸ್ಯ ತವ ಧರ್ಮಭೂತಯುದ್ಧಕರ್ತವ್ಯತಾನುವಾದಪ್ರಸಂಗಾಗತತ್ವಾತ್ ಅಸ್ಯೋಪದೇಶಸ್ಯ ನಾನೇನ ಮಿಷೇಣ ಸಮುಚ್ಚಯಃ ಸಿಧ್ಯತೀತ್ಯರ್ಥಃ ॥ ೩೮ ॥