ಈಶ್ವರಾರ್ಪಣಧಿಯಾ ಸ್ವಧರ್ಮಾನುಷ್ಠಾನೇಽಪಿ ಫಲಕಾಮನಾಭಾವಾದ್ವೈಫಲ್ಯಂ ಯೋಗಮಾರ್ಗಸ್ಯೇತಿ ಮನ್ವಾನಃ ಶಂಕತೇ -

ಸರ್ವೇಷ್ವಿತಿ ।

ಕರ್ಮಮಾರ್ಗಸ್ಯ ಫಲವತ್ತ್ವಂ ಪ್ರತಿಜಾನೀತೇ-

ಉಚ್ಯತ ಇತಿ ।

ಕಿಂ ತತ್ಫಲಮ್ ? ಇತ್ಯುಕ್ತೇ ತದ್ವಿಷಯಂ ಶ್ಲೋಕಮವತಾರಯತಿ -

ಶ್ರೃಣ್ವಿತಿ ।

ಯಥಾ ಉದಪಾನೇ - ಕೂಪಾದೌ ಪರಿಚ್ಛಿನ್ನೋದಕೇ ಸ್ನಾನಾಚಮನಾದಿರ್ಯೋಽರ್ಥೋ ಯಾವಾನ್ ಉತ್ಪದ್ಯತೇ ಸ ತಾವಾನ್ ಅಪರಿಚ್ಛಿನ್ನೇ ಸರ್ವತಃಸಂಪ್ಲುತೋದಕೇ ಸಮುದ್ರೇಽಂತರ್ಭವತಿ, ಪರಿಚ್ಛಿನ್ನೋದಕಾನಾಮ್ ಅಪರಿಚ್ಛಿನ್ನೋದಕಾಂಶತ್ವಾತ್ । ತಥಾ, ಸರ್ವೇಷು ವೇದೋಕ್ತೇಷು ಕರ್ಮಸು ಯಾವಾನ್ ಅರ್ಥೋ ವಿಷಯವಿಶೇಷೋಪರಕ್ತಃ ಸುಖವಿಶೇಷೋ ಜಾಯತೇ, ಸ ತಾವಾನ್ ಆತ್ಮವಿದಃ ಸ್ವರೂಪಭೂತೇ ಸುಖೇಽಂತರ್ಭವತಿ, ಪರಿಚ್ಛಿನ್ನಾನಂದಾನಾಮ್ ಅಪರಿಚ್ಛಿನ್ನಾನಂದಾಂತರ್ಭಾವಾಭ್ಯುಪಗಮಾತ್ , ‘ಏತಸ್ಯೈವಾನಂದಸ್ಯಾನ್ಯಾನಿ ಭೂತಾನಿ ಮಾತ್ರಾಮುಪಜೀವಂತಿ’ (ಬೃ. ಉ. ೪-೩-೩೨) ಇತಿ ಶ್ರುತೇಃ ।