ఈశ్వరార్పణధియా స్వధర్మానుష్ఠానేఽపి ఫలకామనాభావాద్వైఫల్యం యోగమార్గస్యేతి మన్వానః శఙ్కతే -
సర్వేష్వితి ।
కర్మమార్గస్య ఫలవత్త్వం ప్రతిజానీతే-
ఉచ్యత ఇతి ।
కిం తత్ఫలమ్ ? ఇత్యుక్తే తద్విషయం శ్లోకమవతారయతి -
శ్రృణ్వితి ।
యథా ఉదపానే - కూపాదౌ పరిచ్ఛిన్నోదకే స్నానాచమనాదిర్యోఽర్థో యావాన్ ఉత్పద్యతే స తావాన్ అపరిచ్ఛిన్నే సర్వతఃసమ్ప్లుతోదకే సముద్రేఽన్తర్భవతి, పరిచ్ఛిన్నోదకానామ్ అపరిచ్ఛిన్నోదకాంశత్వాత్ । తథా, సర్వేషు వేదోక్తేషు కర్మసు యావాన్ అర్థో విషయవిశేషోపరక్తః సుఖవిశేషో జాయతే, స తావాన్ ఆత్మవిదః స్వరూపభూతే సుఖేఽన్తర్భవతి, పరిచ్ఛిన్నానన్దానామ్ అపరిచ్ఛిన్నానన్దాన్తర్భావాభ్యుపగమాత్ , ‘ఎతస్యైవానన్దస్యాన్యాని భూతాని మాత్రాముపజీవన్తి’ (బృ. ఉ. ౪-౩-౩౨) ఇతి శ్రుతేః ।