ಯದಿ ಗೃಹಸ್ಥಾನಾಂ ಬ್ರಹ್ಮಜ್ಞಾನಂ ಸ್ಮಾರ್ತೈರೇವ ಕರ್ಮಭಿಃ ಸಮುಚ್ಚಿತಂ ಮೋಕ್ಷಹೇತುರಿತಿ ವಿವಕ್ಷಿತಂ, ತದಾ ತಾನ್ ಪ್ರತಿ ಯಾವಜ್ಜೀವಶ್ರುತಿರ್ವಿರುಧ್ಯೇತ । ಯದಿ ಸ್ಮಾರ್ತೈರಪಿ ಕರ್ಮಭಿಃ ಸಮುಚ್ಚಿತಂ ತದೀಯಂ ಜ್ಞಾನಂ ಮೋಕ್ಷಸಾಧನಂ ವಿವಕ್ಷ್ಯತೇ, ತದಾ ಸಿದ್ಧಸಾಧ್ಯತೇತಿ ಪ್ರಾಗುಕ್ತಮಭಿಪ್ರೇತ್ಯ ಚೋದಯತಿ -

ಅಥೇತಿ ।

ಆಶ್ರಮಾಂತರಾಣಾಂ ತರ್ಹಿ ಕೇವಲಾದೇವ ಜ್ಞಾನಾನ್ಮುಕ್ತಿರಿತಿ ಪ್ರಾಗುಕ್ತವಿರೋಧತಾದವಸ್ಥ್ಯಮಿತ್ಯಾಶಂಕ್ಯಾಹ -

ಊರ್ಧ್ವರೇತಸಾಂ ತ್ವಿತಿ ।

ಯಥೋಕ್ತೇ ವಿಭಾಗೇ, ಗಾರ್ಹಸ್ಥ್ಯಂ ಕ್ಲೇಶಾತ್ಮಕಕರ್ಮಬಾಹುಲ್ಯಾದನುಪಾದೇಯಮಾಪದ್ಯೇತೇತಿ ದೂಷಯತಿ -

ತತ್ರೇತಿ ।