యది గృహస్థానాం బ్రహ్మజ్ఞానం స్మార్తైరేవ కర్మభిః సముచ్చితం మోక్షహేతురితి వివక్షితం, తదా తాన్ ప్రతి యావజ్జీవశ్రుతిర్విరుధ్యేత । యది స్మార్తైరపి కర్మభిః సముచ్చితం తదీయం జ్ఞానం మోక్షసాధనం వివక్ష్యతే, తదా సిద్ధసాధ్యతేతి ప్రాగుక్తమభిప్రేత్య చోదయతి -

అథేతి ।

ఆశ్రమాన్తరాణాం తర్హి కేవలాదేవ జ్ఞానాన్ముక్తిరితి ప్రాగుక్తవిరోధతాదవస్థ్యమిత్యాశఙ్క్యాహ -

ఊర్ధ్వరేతసాం త్వితి ।

యథోక్తే విభాగే, గార్హస్థ్యం క్లేశాత్మకకర్మబాహుల్యాదనుపాదేయమాపద్యేతేతి దూషయతి -

తత్రేతి ।