తదేకమిత్యాదివాక్యస్యాక్షరోత్థమర్థముక్త్వా, సముచ్చయస్య శాస్త్రార్థత్వాభావే తాత్పర్యమాహ -
యది హీతి ।
గుణభూతమపీత్యాదినా ప్రధానభూతమపి వేతి వివక్షితమ్ ।
నను ఉభయప్రాప్త్యసమ్భవమాత్మనో మన్యమానస్యార్జునస్యాన్యతరవిషయా శుశ్రూషా భవిష్యతి ? నేత్యాహ -
న హీతి ।
యథోక్తభగవద్వచనాభావే ద్వయప్రాప్త్యసమ్భవబుద్ధ్యా నాన్యతరప్రార్థనా సమ్భవతీత్యాహ -
యేనేతి ।
నహి తథావిధం భగవద్వచనం భవతేష్టం, భగవతః సముచ్చయవాదిత్వాఙ్గీకారాత్ । అతస్తదభావాదుక్తబుద్ధ్యా న యుక్తాఽన్యతరప్రార్థనేత్యర్థః ॥ ౨ ॥