ಭಗವತ್ಪ್ರಾಪ್ತೇಃ ಬುದ್ಧಿಸಾಧ್ಯತ್ವೇ ಸತಿ ಅನಿತ್ಯತ್ವಾಪತ್ತೇಃ ತ್ವಮಪಿ ಭಕ್ತೇಭ್ಯಃ ಬುದ್ಧಿಯೋಗಂ ದದಾಸಿ ಇತ್ಯಯುಕ್ತಮ್ , ಇತಿ ಶಂಕತೇ -
ಕಿಮರ್ಥಮಿತಿ ।
ತೇಷಾಂ ಬುದ್ಧಿಯೋಗಂ ಕಿಮರ್ಥಂ ದದಾಸಿ ಇತಿ ಸಂಬಂಧಃ ।
ಭಗವತ್ಪ್ರಾಪ್ತಿಪ್ರತಿಬಂಧಕನಾಶಕೋ ಬುದ್ಧಿಯೋಗಃ, ತೇನ ನಾಸ್ತಿ ತತ್ಪ್ರಾಪ್ತೇಃ ಅನಿತ್ಯತ್ವಮ್ , ಇತ್ಯಾಶಂಕ್ಯ ಆಹ -
ಕಸ್ಯೇತಿ ।
ಭಕ್ತಾನಾಂ ತತ್ಪ್ರಾಪ್ತಿಪ್ರತಿಬಂಧಕಂ ವಿವಿಚ್ಯ ದರ್ಶಯತಿ -
ಇತ್ಯಾಕಾಂಕ್ಷಾಯಾಮಿತಿ ।
ಅವಿವೇಕೋ ನಾಮ ಅಜ್ಞಾನಮ್ । ತತೋ ಜಾತಂ ಮಿಥ್ಯಾಜ್ಞಾನಮ್ । ತದುಭಯಮ್ ಏಕೀಕೃತ್ಯ ತಮೋ ವಿವಕ್ಷ್ಯತೇ । ನ ಚ ತನ್ನಾಶಕತ್ವಂ ಜಡಸ್ಯ ಕಸ್ಯಚಿತ್ ತದಂತರ್ಭೂತಸ್ಯ ಯುಕ್ತಮ್ । ತೇನ ಅಹಂ ನಾಶಯಾಮಿ, ಇತ್ಯುಕ್ತಮ್ ।