స్యాణౌ పురుషనిశ్చయవత్ ఆత్మనో దేహాద్యాత్మత్వనిశ్చయస్య అధ్యస్తతా, ఇతి అయుక్తమ్ , దృష్టాన్తస్య జ్ఞేయమాత్రవిషయత్వాత్ , ఇతరస్య జ్ఞేయజ్ఞాతృవిషయత్వాత్ , ఇతి ఉక్తమ్ అనువదతి -
యత్త్వితి ।
వైషమ్యం దూషయతి -
తదసదితి ।
తర్హి కేన సాధర్మ్యమ్ , ఇతి పృచ్ఛతి -
కథమితి ।
అభీష్టం సాధర్మ్యం దర్శయతి -
అవిద్యేతి ।
తస్య ఉభయత్ర అనుగతిమ్ ఆహ -
తన్నేతి ।
జ్ఞేయాన్తరే జ్ఞేయస్య ఆరోపనియమాత్ జ్ఞాతరి న ఆరోపః స్యాత్ , ఇత్యాశఙ్క్య ఆహ -
యత్త్వితి ।
నాయం నియమః, జ్ఞాతరి జరాద్యారోపస్య ఉక్తత్వాత్ , ఇత్యాహ -
తస్యాపీతి ।
జ్ఞేయస్యైవ జ్ఞేయాన్తరే అధ్యాసనియమస్య ఇతి యావత్ । అతో జ్ఞాతరి న ఆరోపవ్యభిచారశఙ్కా, ఇత్యర్థః ।