ದೃಶ್ಯಾನಾಂ ದುಃಖಾದೀನಾಂ ಭೇದಕಾನಾಂ ಯಾವದ್ದೇಹಭಾವಿನಾಮ್ ಅನಾತ್ಮಧರ್ಮತ್ವಸಿದ್ಧಯೇ ದ್ರಷ್ಟಾರಂ ದೇಹಾತ್ ಅನ್ಯಮ್ ಉಕ್ತ್ವಾ, ಸಾಂಖ್ಯಾನಾಮಿವ ತನ್ಮಾತ್ರೇಣ ಮುಕ್ತಿನಿವೃತ್ತಯೇ ತಸ್ಯ ಸರ್ವದೇಹೇಷು ಐಕ್ಯೋಕ್ತಿಪೂರ್ವಕಂ ಸ್ವೇನ ಪರಮಾರ್ಥೇನ ಅಕ್ಷರೇಣ ಐಕ್ಯಂ ವೃತ್ತಮ್ ಅನೂದ್ಯ ಪ್ರಶ್ನದ್ವಾರಾ ದರ್ಶಯತಿ-

ಏವಮಿತ್ಯಾದಿನಾ ।

ಯಥೋಕ್ತ - ಲಕ್ಷಣಮ್ - ದೃಶ್ಯಾತ್ ದೇಹಾತ್ ನಿಷ್ಕೃಷ್ಟಂ ದ್ರಷ್ಟಾರಮ್ ಇತ್ಯರ್ಥಃ । ಚ, ಅಪಿ ಇತಿ ನಿಪಾತೌ ಜೀವಸ್ಯ ಅಕ್ಷರತ್ವಜ್ಞಾನಸ್ಯ ದೇಹಾತ್ ಅನ್ಯತ್ವಜ್ಞಾನೇನ ಸಮುಚ್ಚಯಾರ್ಥೌ ಭಿನ್ನಕ್ರಮೌ ; ನ ಕ್ಷೇತ್ರಜ್ಞಂ ಸಾಂಖ್ಯವತ್ ದೃಶಯಾತ್ ಅನ್ಯಮೇವ ವಿದ್ಧಿ ; ಕಿಂತು ಮಾಂ ಚಾಪಿ ವಿದ್ಧಿ ಇತಿ ಸಂಬಧ್ಯತೇ ।