ರಜಸ್ತರ್ಹಿ ಕಿಂಲಕ್ಷಣಮ್ ? ಕಥಂ ವಾ ಪುರುಷಂ ನಿಬಧ್ನಾತಿ ಇತಿ ಆಶಂಕ್ಯ, ಆಹ -
ರಜ ಇತಿ ।
ರಜ್ಯತೇ - ಸಂಸೃಜ್ಯತೇ ಅನೇನ ಪುರುಷಃ ದೃಶ್ಯೈಃ, ಇತಿ ರಾಗಃ, ಅಸೌ ಆತ್ಮಾ ಅಸ್ಯ, ಇತಿ ರಾಗಾತ್ಮಕಂ ರಜೋ ಜಾನೀಹಿ, ಇತ್ಯಾಹ -
ರಂಜನಾದಿತಿ ।
ಸಮುದ್ಭವತಿ ಅಸ್ಮಾತ್ , ಇತಿ ಸಮುದ್ಭವಃ । ತೃಷ್ಣಾ ಚ ಆಸಂಗಶ್ಚ ತೃಷ್ಣಾಸಂಗೌ, ತಯೋಃ ಸಮುದ್ಭವಃ, ತಮ್ ಇತಿ ವಿಗ್ರಹಂ ಗೃಹೀತ್ವಾ, ಕಾರ್ಯದ್ವಾರಾ ರಜೋವಿವಕ್ಷುಃ, ತೃಷ್ಣಾಸಂಗಯೋಃ ಅರ್ಥಭೇದಮ್ ಆಹ -
ತೃಷ್ಣೇತ್ಯಾದಿನಾ ।
ರಜಸೋ ಲಕ್ಷಣಂ ಉಕ್ತ್ವಾ ನಿಬಂಧೃತ್ವಪ್ರಕಾರಮ್ ಆಹ -
ತದ್ರಜ ಇತಿ ।
ಕರ್ಮಸಂಗಂ ವಿಭಜತೇ -
ದೃಷ್ಟೇತಿ ।
ಅಕರ್ತಾರಮೇವ ಪುರುಷಂ ಕರೋಮಿ ಇತ್ಯಭಿಮಾನೇನ ಪ್ರವರ್ತಯತಿ ಇತ್ಯರ್ಥಃ
॥ ೭ ॥