ఇన్ద్రియాణి చక్షురాదీని హయానాహుః రథకల్పనాకుశలాః, శరీరరథాకర్షణసామాన్యాత్ । తేషు ఇన్ద్రియేషు హయత్వేన పరికల్పితేషు గోచరాన్ మార్గాన్ రూపాదీన్విషయాన్ విద్ధి । ఆత్మేన్ద్రియమనోయుక్తం శరీరేన్ద్రియమనోభిః సహితం సంయుతమాత్మానం భోక్తేతి సంసారీతి ఆహుః మనీషిణః వివేకినః । న హి కేవలస్యాత్మనో భోక్తృత్వమస్తి ; బుద్ధ్యాద్యుపాధికృతమేవ తస్య భోక్తృత్వమ్ । తథా చ శ్రుత్యన్తరం కేవలస్యాభోక్తృత్వమేవ దర్శయతి — ‘ధ్యాయతీవ లేలాయతీవ’ (బృ. ఉ. ౪ । ౩ । ౭) ఇత్యాది । ఎవం చ సతి వక్ష్యమాణరథకల్పనయా వైష్ణవస్య పదస్యాత్మతయా ప్రతిపత్తిరుపపద్యతే, నాన్యథా, స్వభావానతిక్రమాత్ ॥