ನನು ಏವಮಪಿ ತಲ್ಲಕ್ಷಣಸ್ಯ ವಸ್ತುನಃ ಸದ್ಭಾವಮಾತ್ರಮ್ ಇಹ ಕಥನೀಯಮ್ ; ನ ಹಿ ಯತ್ರ ಯಸ್ಯ ಸದ್ಭಾವಃ ಪ್ರಮಾಣತಃ ಪ್ರತಿಪನ್ನಃ, ತತ್ರೈವ ತಸ್ಯ ಅಸಂಭಾವನಾಶಂಕಾ, ಯೇನ ತದ್ವಿನಿವೃತ್ತಯೇ ತತ್ಸಂಭಾವನಾ ಅಪರಾ ಕಥ್ಯೇತ ; ಸತ್ಯಮೇವಂ, ವಿಷಯವಿಶೇಷಸ್ತು ಪ್ರಯತ್ನೇನ ಅನ್ವಿಚ್ಛದ್ಭಿರಪಿ ಅನುಪಲಭ್ಯಮಾನಕಾರಣದೋಷೇ ವಿಜ್ಞಾನೇ ಅವಭಾಸಮಾನೋಽಪಿ ಪೂರ್ವಪ್ರವೃತ್ತೇನ ಸಕಲಲೋಕವ್ಯಾಪಿನಾ ನಿಶ್ಚಿತೇನ ಪ್ರಮಾಣೇನ ಅಸಂಭಾವ್ಯಮಾನತಯಾ ಅಪೋದ್ಯಮಾನೋ ದೃಶ್ಯತೇ । ತದ್ಯಥಾ — ಔತ್ಪಾತಿಕಃ ಸವಿತರಿ ಸುಷಿಃ, ಯಥಾ ವಾ ಮಾಹೇಂದ್ರಜಾಲಕುಶಲೇನ ಪ್ರಾಸಾದಾದೇಃ ನಿಗರಣಮ್ । ಏವಮ್ ಅವಿಷಯೇ ಅಸಂಗೇ ಕೇನಚಿದಪಿ ಗುಣಾದಿನಾ ಅಧ್ಯಾಸಹೇತುನಾ ರಹಿತೇ ನಿಷ್ಕಲಂಕಚೈತನ್ಯತಯಾ ಅನ್ಯಗತಸ್ಯಾಪಿ ಅಧ್ಯಾಸಸ್ಯ ಅಪನೋದನಸಮರ್ಥೇ ಅಧ್ಯಾಸಾವಗಮಃ ಅವಿಭಾವ್ಯಮಾನಕಾರಣದೋಷಃ ವಿಭ್ರಮಃ ಇತಿ ಆಶಂಕ್ಯೇತ, ತತ್ ಮಾ ಶಂಕಿ ಇತಿ, ಸದ್ಭಾವಾತಿರೇಕೇಣ ಸಂಭವೋಽಪಿ ಪೃಥಕ್ ಕಥನೀಯಃ ; ತದುಚ್ಯತೇ ;
“ಆಹ ಕೋಽಯಮಧ್ಯಾಸೋ ನಾಮ” ಇತಿ
ಕಿಂವೃತ್ತಸ್ಯ ಪ್ರಶ್ನೇ ಆಕ್ಷೇಪೇ ಚ ಪ್ರಯೋಗದರ್ಶನಾತ್ ಉಭಯಸ್ಯ ಚ ಇಹ ಸಂಭವಾತ್ ತಂತ್ರೇಣ ವಾಕ್ಯಮುಚ್ಚರಿತಮ್ । ತತ್ರಾಪಿ ಪ್ರಥಮಂ ಪ್ರಶ್ನಸ್ಯ ಪ್ರತಿವಚನಂ ಸ್ವರೂಪಮ್ ಆಖ್ಯಾಯ ಪುನಃ ತಸ್ಯೈವ ಸಂಭವಮ್ ಆಕ್ಷಿಪ್ಯ ಪ್ರತಿವಿಧತ್ತೇ । ತತ್ರ ಏವಂಭೂತೇ ವಿಷಯೇ ಶ್ರೋತೄಣಾಂ ಸುಖಪ್ರಬೋಧಾರ್ಥಂ ವ್ಯಾಚಕ್ಷಾಣಾಃ ಪ್ರತಿವಾದಿನಂ ತತ್ರಸ್ಥಮಿವ ಸಮುತ್ಥಾಪ್ಯ ತೇನ ಆಕ್ಷಿಪ್ತಮ್ ಅನೇನ ಪೃಷ್ಟಮಿತಿ ಮತ್ವಾ ಪ್ರತ್ಯುಕ್ತಂ, ಪುನರಸೌ ಸ್ವಾಭಿಪ್ರಾಯಂ ವಿವೃಣೋತಿ ಇತಿ ಆಕ್ಷೇಪಮವತಾರ್ಯ ಪ್ರತಿವಿಧಾನಂ ಪ್ರತಿಪದ್ಯಂತೇ । ಸರ್ವತ್ರ ಏವಂವಿಧೇ ಗ್ರಂಥಸನ್ನಿವೇಶೇ ಏಷ ಏವ ವ್ಯಾಖ್ಯಾಪ್ರಕಾರಃ ।
ನಿವರ್ತ್ಯಭ್ರಮಸದ್ಭಾವಾತ್ ಸಂಭಾವನಾ ವಾಚ್ಯೇತ್ಯಾಶಂಕ್ಯ ಭ್ರಮಪ್ರಾಪ್ತಿರೇವ ನಾಸ್ತೀತ್ಯಾಹ -
ನ ಹಿ ಯತ್ರ ಯಸ್ಯೇತಿ ।
ಯತ್ರ ಯಸ್ಯ ಸದ್ಭಾವಃ ಪ್ರತಿಪನ್ನಃ ತತ್ರ ತಸ್ಯಾಅಸಂಭವನಾ ಇತಿಸಂಭಾವನಾಶಂಕಾ ನಾಸ್ತೀತ್ಯುಕ್ತೇ ದರ್ಪಣಪ್ರತಿಪನ್ನಮುಖಸ್ಯ ತತ್ರಾಸಂಭಾವನಾ ದೃಶ್ಯತ ಇತ್ಯಾಶಂಕಾಯಾಮ್, ತದ್ವ್ಯಾವರ್ತಯತಿ -
ಪ್ರಮಾಣತ ಇತಿ ।
ಏವಮುಕ್ತೇ ಆತ್ಮನ್ಯನುಮಾನಾದಿಪ್ರಮಾಣಸಿದ್ಧಾವಿದ್ಯಾಯಾಂ ವ್ಯಭಿಚಾರೇ ತಮಪನುದತಿ -
ತತ್ರೈವೇತಿ ।
ಅವಿದ್ಯಾಯಾ ನ ಕೇವಲಮಾತ್ಮನ್ಯೇವಾಸಂಭಾವನಾ, ಕಿಂತು ಜಡೇ ಚಾಸಂಭಾವನೇತಿ ಭಾವಃ ।
ಕಾಚೋಪಾಧಿಸನ್ನಿಧ್ಯುಪಾಧಿಸಂಶ್ಲೇಷದೂರತ್ವಾಖ್ಯದೋಷಚತುಷ್ಟಯಹೀನಂ ಭ್ರಮಕಾರ್ಯೇಣ ಕಲ್ಪ್ಯಾದೃಷ್ಟದೋಷಹೀನಂ ಚ ಜ್ಞಾನಂ ನಿರೂಪ್ಯಮಾಣೇ ಪ್ರಮಾಣಮ್, ತಸ್ಮಿನ್ ಪ್ರತಿಪನ್ನಸ್ಯಾಸಂಭಾವನಾ ನಾಸ್ತಿ । ಕಾಚಾದ್ಯಭಾವೇಽಪಿ ಕಲ್ಪ್ಯೋಽದೃಷ್ಟದೋಷ ಇತಿ । ವೃತ್ತಿಪ್ರತಿಭಾಸತಃ ಪ್ರಮಾಣಜ್ಞಾನೇ ಪ್ರತಿಪನ್ನಸ್ಯಾಸಂಭಾವನಾ ಸ್ಯಾದಿತ್ಯಾಹ –
ಸತ್ಯಮಿತಿ ।
ರೂಪ್ಯಜ್ಞಾನೇ ಝಟಿತಿ ಬಾಧಯಾ ಗಮ್ಯಕಾಚದೇವತ್ ಇತಿಕಾಚಾದಿವತ್ ಸುಷಿರಜ್ಞಾನಸ್ಯ ಕಾರದೋಷ ಇತಿಕಾರಣದೋಷೋ ನಾಸ್ತೀತ್ಯಾಹ -
ಅನುಪಲಭ್ಯಮಾನೇತಿ ।
ದರ್ಪಣಸಂಸ್ಥಂ ಮುಖಮಿತಿ ಜ್ಞಾನೇ ದರ್ಪಣೋಪಾಧೇರನ್ವಯವ್ಯತಿರೇಕಾನುಸಂಧಾನೇನ ಗಮ್ಯೋಪಾಧಿಸಂನಿಧಿದೋಷವತ್ ಸುಷಿರಜ್ಞಾನಸ್ಯಾಪ್ಯುಪಾಧಿಸನ್ನಿಧಿದೋಷೋ ನಾಸ್ತೀತ್ಯಾಹ –
ಅನ್ವಿಚ್ಛದ್ಭಿರಪೀತಿ ।
ಹ್ರಸ್ವೋ ವರ್ಣ ಇತಿ ಭ್ರಮೇ ಉಪಾಧಿಭೂತಧ್ವನಿಸಂಬಂಧವ್ಯತಿರೇಕೇಣ ಕೇವಲವರ್ಣೋಪಲಬ್ಧ್ಯಭಾವಾದೇವೋಪಾಧೇರ್ವರ್ಣಾದ್ಯತಿರೇಕಾನುಸಂಧಾನಾಯೋಗೋ ಧ್ವನ್ಯಂತರಸಂಬಂಧೇ ದೀರ್ಘೋ ಭವತಿ, ತತೋಽನ್ಯಧ್ವನಿಸಂಬಂಧೇ ಹ್ರಸ್ವೋ ಭವತಿ ಇತಿ ಉಪಾಧಿವ್ಯಭಿಚಾರಾನುಸಂಧಾನೇನ ಗಮ್ಯೋಪಾಧಿಸಂಶ್ಲೇಷದೋಷೋ ನಾಸ್ತೀತ್ಯಾಹ –
ಯತ್ನೇನಾನ್ವಿಚ್ಛದ್ಭಿರಪೀತಿ ।
ಪರ್ವತಾಗ್ರಸ್ಥವೃಕ್ಷಾಲ್ಪತ್ವಭ್ರಮೇ ಪರ್ವತಾರೋಹಣೇನ ಗಮ್ಯಂ ದೂರತ್ವಾದಿದೋಷಮಾಹ –
ಪೂರ್ವವೃತ್ತೇನೇತಿ ।
ಪೂರ್ವರಜತಜ್ಞಾನಸ್ಯ ಉತ್ತರಶುಕ್ತಿಜ್ಞಾನವಿಷಯಶುಕ್ತಾವಸಂಭಾವನಾಹೇತುತ್ವಮ್, ನ ದೃಶ್ಯತ ಇತ್ಯಾಶಂಕ್ಯ ತತೋ ವಿಶಿನಷ್ಟಿ -
ಪ್ರವೃತ್ತೇನೇತಿ ।
ಪ್ರವಾಹರೂಪೇಣ ಪ್ರವೃತ್ತೇನೇತ್ಯರ್ಥಃ
ಪೂರ್ವಪ್ರವೃತ್ತದರ್ಪಣಸ್ಥಂ ಮುಖಮಿತಿ ಜ್ಞಾನಮ್ ಉತ್ತರಗ್ರೀವಾಸ್ಥಂ ಮುಖಮಿತಿ ಜ್ಞಾನವಿಷಯೇನಾಸಂಭಾವನಾಹೇತುರಿತ್ಯಾಶಂಕ್ಯ ವಿಶಿನಷ್ಟಿ -
ಸಕಲಲೋಕವ್ಯಾಪಿನೇತಿ ।
ಹ್ರಸ್ವೋಽಕಾರ ಇತಿ ಜ್ಞಾನೇನ ಸ ಏವಾಯಮಕಾರ ಇತಿ ಜ್ಞಾನವಿಷಯಸರ್ವಗತತ್ವನಿತ್ಯತ್ವಯೋಃ ನಾಸಂಭಾವನೇತ್ಯಾಶಂಕ್ಯ ವಿಶಿನಷ್ಟಿ -
ನಿಶ್ಚಿತೇನೇತಿ ।
ಸವಿತರಿ ಸುಷಿರಪ್ರತಿಭಾಸಃ ಕಸ್ಯಚಿದೇವಾಲ್ಪಾಯುಷಃ ಪುರುಷಸ್ಯ ಭವತೀತ್ಯತಃ ಸರ್ವಜನಪ್ರಸಿದ್ಧೋದಾಹರಣಮಾಹ -
ಯಥಾ ವಾ ಮಾಹೇಂದ್ರೇತಿ ।
ನಿಗರಣಸ್ಯ ಝಟಿತಿ ಬಾಧಾತ್ ಪ್ರತಿಭಾಸತಃ ಪ್ರಮಾಣವಿಷಯತ್ವಂ ನಾಸ್ತೀತಿ ನಾಶಂಕಾ, ಪ್ರಸಿದ್ಧನಿಗರಣಸ್ಯಾಪಿ ಕ್ಷಣಿಕತ್ವಾತ್ ಸದ್ಯೋ ನಾಶೋ ಭವತಿ, ತದ್ವದತ್ರಾಪಿ ಸದ್ಯೋ ನಾಶ ಏವೇತಿ ಝಟಿತಿ ಬಾಧಾಭಾವಾತ್ । ಅವಿಷಯ ಇತಿ ಶುಕ್ತಿವದಾರೋಪ್ಯೇಣ ಸಹೈಕಜ್ಞಾನಾವಿಷಯ ಇತ್ಯರ್ಥಃ ।
ಅಸಂಗ ಇತಿ ।
ಆತ್ಮಾತಿರಿಕ್ತಸ್ಯ ಕೃತ್ಸ್ನಸ್ಯಾಧ್ಯಸ್ತತ್ವಾತ್ ಆತ್ಮನ್ಯೇವ ದೋಷಾನುಷಂಗೋ ವಕ್ತವ್ಯಃ, ಸೋಽಪಿ ನಾಸ್ತೀತ್ಯರ್ಥಃ ।
ಆರೋಪ್ಯೇಣ ಗುಣಾವಯವಸಾದೃಶ್ಯಮಧಿಷ್ಠಾನಸ್ಯ ವಕ್ತವ್ಯಮ್ , ತಚ್ಚ ನಾಸ್ತೀತ್ಯಾಹ -
ಕೇನಚಿದಪಿ ಗುಣಾಗುಣಾದಿನೇತಿಗುಣದಿನೇತಿ ।
ಅಧ್ಯಾಸ ವಿರೋಧ್ಯಧಿಷ್ಠಾನಯಾಥಾತ್ಮ್ಯಾವಭಾಸೋಽಪ್ಯಾತ್ಮನಿ ವಿದ್ಯತ ಇತ್ಯಾಹ –
ನಿಷ್ಕಲಂಕಚೈತನ್ಯತಯೇತಿ ।
ಶುಕ್ತಿತತ್ತ್ವವಿಷಯವೃತ್ತೇರಧ್ಯಾಸವಿರೋಧಿತ್ವಾದತ್ರ ಅಹಂ ಬ್ರಹ್ಮಾಸ್ಮೀತ್ಯಾತ್ಮತತ್ವವಿಷಯಬುದ್ಧಿವೃತ್ತ್ಯಭಾವಾದಧ್ಯಾಸೋಽಸ್ತೀತ್ಯಾಶಂಕ್ಯ ತತ್ರಾಪಿ ಶುಕ್ತಿಬುದ್ಧಿಪ್ರತಿಬಿಂಬಿತಾಜಡಬೋಧಸ್ಯೈವ ನಿವರ್ತಕತ್ವಾತ್ ಬೋಧಾತ್ಮನಿ ನಾಹಂಕಾರಾದ್ಯಧ್ಯಾಸ ಇತ್ಯಾಹ -
ಅನ್ಯಗತಸ್ಯಾಪ್ಯಧ್ಯಾಸಸ್ಯೇತಿ ।
ಅಧ್ಯಾಸಾವಗಮ ಇತಿ ।
ಅಧ್ಯಾಸೋಽಸ್ತೀತಿ ಸಾಧಕಪ್ರಮಾಣಮಿತ್ಯರ್ಥಃ ।
ತದುಚ್ಯತ ಇತಿ ।
ತತ್ತ್ರಿತಯಂ ಲಕ್ಷಣಂ ಸಂಭಾವನಾಪ್ರಮಾಣಂ ಕ್ರಮೇಣೋಚ್ಯತ ಇತ್ಯರ್ಥಃ ।
ಕಿಂ ವೃತ್ತಸ್ಯೇತಿ ।
ಹಿರಣ್ಯಗರ್ಭವಾಚಿಕಶಬ್ದೇನ ನಿಷ್ಪನ್ನಂ ಕ ಇತಿ ಪದಂ ನ, ಕಿಂತು ಕಿಂ ಶಬ್ದನಿಷ್ಪನ್ನಮಿತ್ಯರ್ಥಃ ।
ಅನೇಕಸ್ಮಿನ್ನರ್ಥೇ ಪ್ರಯೋಗದರ್ಶನಾದೇವ ಯದ್ಯಪಿ ತತ್ರ ಶಕ್ತಿರಸ್ತಿ, ತಥಾಪ್ಯೇಕಸ್ಮಿನ್ ಪ್ರಯೋಗ ಏಕ ಏವಾರ್ಥಃ ಸ್ಯಾದಿತ್ಯಾಶಂಕ್ಯ ಉಭಯಮಪ್ಯತ್ರ ವಿವಕ್ಷಿತಮಿತ್ಯಾಹ -
ಉಭಯಸ್ಯ ಚೇತಿ ।
ಪೂರ್ವಭಾಷ್ಯೇ ಅಧ್ಯಾಸ ಇತ್ಯುಕ್ತೇ ಸಾಮಾನ್ಯಜ್ಞಾನಾತ್ ಪ್ರಶ್ನಃ ಸಂಭವತಿ । ಆತ್ಮಾನಾತ್ಮನೋರಧ್ಯಾಸಆತ್ಮನಾತ್ಮನೋರಿತಿ ಇತ್ಯುಕ್ತೇ ವಿಶೇಷಜ್ಞಾನಾದಾಕ್ಷೇಪಃ ಸಂಭವತೀತ್ಯರ್ಥಃ ।
ಉಭಯಮತ್ರ ವಿವಕ್ಷಿತಂ ಭವತು, ತಥಾಪ್ಯೇಕಸ್ಯ ವಾಕ್ಯಸ್ಯಾರ್ಥದ್ವಯೇ ತಾತ್ಪರ್ಯಂ ನಾಸ್ತೀತ್ಯಾಶಂಕ್ಯಾತ್ರ ವಾಕ್ಯದ್ವಯಮರ್ಥದ್ವಯಪರತಯಾ ತಂತ್ರೇಣೋಚ್ಚರಿತಮಿತ್ಯಾಹ –
ತಂತ್ರೇಣೇತಿ ।
ಪರಿಹಾರೋಽಪಿ ಕಿಂ ತಂತ್ರೇಣ ಕ್ರಿಯತ ಇತಿ, ನೇತ್ಯಾಹ –
ತತ್ರಾಪೀತಿ ।
ಯದ್ಯಪಿ ಆಕ್ಷೇಪಸ್ಯಾಧ್ಯಾಸಸ್ವರೂಪಾಪಹಾರಕತ್ವೇನ ಪ್ರಬಲತ್ವಾತ್ ಪ್ರಥಮಮಾಕ್ಷೇಪಃ ಪರಿಹಾರ್ಯಃ । ತಥಾಪಿ ಸ್ವರೂಪಾಪರಿಜ್ಞಾನೇ ಆಕ್ಷೇಪಸ್ಯಾನುದಯಾತ್ ಸ್ವರೂಪಂ ಪ್ರಥಮಮಾಖ್ಯೇಯಮಿತ್ಯಾಹ –
ಸ್ವರೂಪಮಾಖ್ಯಾಯೇತಿ ।
ಇಹೇತಿ ।
ಆತ್ಮನೀತ್ಯರ್ಥಃ ।
ಆಹೇತಿ ಪರೋಕ್ತಿಃ ಕಿಮರ್ಥೇತ್ಯಾಶಂಕ್ಯಾಪರೋಕ್ಷ್ಯಪರ್ಯಂತತ್ವೇನ ಚ ಪ್ರತಿಪಾದನೀಯೇ ಬ್ರಹ್ಮಾತ್ಮವಿಷಯೇ ಸುಖಪ್ರತಿಬೋಧನಾರ್ಥಂ ವಾದಕಥಾ ಪ್ರವರ್ತ್ಯತ ಇತಿ ಪ್ರದರ್ಶಯಿತುಮಿತ್ಯಾಹ –
ತತ್ರೈವಮಿತಿ ।
ತೇನ ಕೃತಮಭಿಪ್ರಾಯಮಾಕ್ಷೇಪರೂಪಮಪಿ ಪ್ರಶ್ನರೂಪಮೇವೇತಿ ಮತ್ವಾ ಪ್ರತ್ಯುಕ್ತಮ್, ಪುನಃ ಪೂರ್ವವಾದ್ಯೇವಾಕ್ಷೇಪರೂಪೇಣ ವಿವೃಣೋತಿ ಇತಿ ಪೂರ್ವವಾದಿಮುಖೇನಾಕ್ಷೇಪಂ ಕಥಂ ಪುನರಿತ್ಯಾದಿನಾವತಾರ್ಯ ಪ್ರತಿವಿಧಾನಂ ಪ್ರತಿಪದ್ಯಂತ ಇತಿ ಯೋಜನಾ ।
ಸ್ವರೂಪಜ್ಞಾನಾಭಾವಾದನವಸರದುಃಸ್ಥೋಽದುಃಸ್ಥೋಽಪಿ ಯಮಾಕ್ಷೇಪ ಇತಿಯಮಾಕ್ಷೇಪ ಇತ್ಯುಕ್ತೇ ಪೂರ್ವವಾದೀ ಸ್ವಾತ್ಮನೋಽಪ್ರಾಪ್ತಕಾರಿತ್ವಂ ಬುದ್ಧ್‍ವಾ ಕುಂಠಿತಮತಿಃಕುಂಠಿತಮಿತಿ ಇತಿ ಪ್ರಶ್ನಪರಿಹಾರಮಪ್ಯವಗಂತುಂ ನ ಶಕ್ನೋತೀತಿ ತಥಾ ನೋಕ್ತಮಿತಿ ಮತ್ವಾ ಆಹ -
ತೇನೇತ್ಯಾರಭ್ಯ ಪ್ರತ್ಯುಕ್ತಮಿತ್ಯಂತೇನ ।
ಆಹ ಕೋಽಯಮಿತ್ಯಸ್ಮಿನ್ ಭಾಷ್ಯೇ ಆಕ್ಷೇಪಸ್ಯ ಕೃತತ್ವಾದುತ್ತರಸ್ಮಿನ್ನಾಕ್ಷೇಪೋ ನ ಕಾರ್ಯ ಇತ್ಯಾಶಂಕ್ಯ - ‘ಸತ್ಯಮ್, ಪೂರ್ವಭಾಷ್ಯೇ ಕೃತ ಆಕ್ಷೇಪಃ ಸಂಭಾವನಾಭಾಷ್ಯೇಣಾವತಾರ್ಯತೇ ಕೇವಲಮಿತ್ಯಾಹ –
ಆಕ್ಷೇಪಮವತಾರ್ಯೇತಿ ।
ಯದುಕ್ತಮಿತ್ಯನುವಾದರೂಪೇಣ ಕಿಮಿತಿ ನಾವತಾರ್ಯತ ಇತ್ಯಾಶಂಕ್ಯ ಆಕ್ಷೇಪಮನೂದ್ಯ ಪರಿಹಾರೋಕ್ತೌ ಮಯಾ ಪ್ರಶ್ನಾಕ್ಷೇಪೌ ಸಹ ಕೃತೌ ತದ್ವಿದಿತ್ವೈವ ದುರ್ಬಲಪ್ರಶ್ನಪರಿಹಾರಂ ಪೂರ್ವಂ ಕೃತ್ವಾ ಪ್ರಬಲಮೇವಾಕ್ಷೇಪಂ ಪಶ್ಚಾತ್ ಪರಿಹರತಿ । ಅತ ಆಕ್ಷೇಪಸ್ಯ ಪ್ರಥಮಪ್ರಾಪ್ತ್ಯಭಾವೇಽಪಿ ಅಜ್ಞಾನಿನಾ ಮಯಾ ಕೃತೋಽಪ್ರಾಪ್ತ ಇತಿ ಪೂರ್ವವಾದೀ ಬುದ್ಧ್‍ವಾ ವಕ್ತುಂ ಕೃತಮತಿರಾಕ್ಷೇಪಪರಿಹಾರಮವಗಂತುಂ ನ ಶಕ್ನೋತೀತಿ ನಾನುವಾದಃ ಕೃತಃ ಇತ್ಯಭಿಪ್ರಾಯೇಣಾಹ –
ಪುನರಸಾವಿತಿ ।
ಯದ್ಯಪಿ ಜಲ್ಪಾದಿಷು ಪರೋಕ್ತಿರ್ವಿದ್ಯತೇ ತಥಾಪ್ಯರ್ಥನಿರ್ಣಯಾಯ ಪ್ರವೃತ್ತೇ ಗ್ರಂಥಸನ್ನಿವೇಶೇ ಪರೋಕ್ತಿರ್ವಾದಕಥಾತ್ವಸೂಚಿಕೇತಿ ವ್ಯಾಖ್ಯೇಯಮಿತ್ಯಾಹ -
ಸರ್ವತ್ರೈವಂವಿಧ ಇತಿ ।