ಅತ ಏವಾರ್ಥಾದಿತಿ ।

ಐಕ್ಯೇ ಸತ್ಯೇವಸತ್ಯೇ ಇತಿ ಬ್ರಹ್ಮರೂಪಾನವಭಾಸಾನುಪಪತ್ತ್ಯಾಚ್ಛಾದಿಕಾವಿದ್ಯಾ ಕಲ್ಪ್ಯತ ಇತ್ಯರ್ಥಃ ।

ಅನ್ಯಥೇತಿ ।

ಅಯಮರ್ಥಃ, ಜೀವಸ್ಯ ಬ್ರಹ್ಮರೂಪತ್ವಾಚ್ಛಾದಿಕಾವಿದ್ಯಾಭಾವೇ ಪರಮಾರ್ಥತೋ ಬ್ರಹ್ಮರೂಪತ್ವಾತ್ ಬ್ರಹ್ಮಾತ್ಮತಾವಬೋಧೋಽಪಿ ತತ್ರ ಯದಿ ನಿತ್ಯಸಿದ್ಧಃ ಸ್ಯಾತ್ ತದಾ ತಾದಾತ್ಮ್ಯೋಪದೇಶೋ ವ್ಯರ್ಥಃ ಸ್ಯಾದಿತಿ । ಐಕ್ಯೇ ಸತಿ ಜೀವಬ್ರಹ್ಮವಿಭಾಗಃ ಕಥಂ ಸಿಧ್ಯೇದಿತ್ಯಾಶಂಕ್ಯ ಅವಿದ್ಯಾಲೇಶೇಷು ಪ್ರತಿಬಿಂಬಿತಚೈತನ್ಯಾನಿ ಜೀವಾ ಇತ್ಯುಚ್ಯಂತೇ ।

ತೇಷಾಂ ಬಿಂಬಭೂತಮಖಂಡಚೈತನ್ಯಂ ಬ್ರಹ್ಮೇತ್ಯತೋ ಬಿಂಬಪ್ರತಿಬಿಂಬಭಾವೇನಾವಿದ್ಯಯಾ ಭೇದ ಇತ್ಯಾಹ –

ಅತೋಽನಾದಿಸಿದ್ಧೇತಿ ।

ನಿರ್ಭಾಸಾಸ್ಪದಮಿತಿ ।

ಪ್ರತಿಬಿಂಬಾಸ್ಪದಮಿತ್ಯರ್ಥಃ ।

ಬ್ರಹ್ಮವ್ಯತಿರಿಕ್ತಮನಾದಿವಸ್ತು ನಾಸೀದಿತಿ ತತ್ರಾಹ -

ತಥಾ ಚ ಸ್ಮೃತಿರಿತಿ ।

ಸಾಂಖ್ಯಾಭಿಮತಪ್ರಕೃತೇರನಾದಿತ್ವಂ ಸ್ಮೃತ್ಯೋಕ್ತಂ ನಾವಿದ್ಯಾಯಾ ಇತಿ, ನೇತ್ಯಾಹ –

ಕ್ಷೇತ್ರಜ್ಞತ್ವನಿಮಿತ್ತಾಮಿತಿ ।

ಜೀವತ್ವೇ ಹೇತುಭೂತಾಮಿತ್ಯರ್ಥಃ ।