ನನು ಅಹಮಿತಿ ಭೋಕ್ತೃತ್ವಂ ಪ್ರತಿಭಾಸತೇ, ತದಭಾವೇ ಕಥಂ ತಥಾ ಪ್ರತಿಭಾಸಃ ? ನೈತತ್ ಸಾರಮ್ ; ಸಮುತ್ಕಾಲಿತೋಪಾಧಿವಿಶೇಷಂ ಚೈತನ್ಯಮಾತ್ರಮಸ್ಮದರ್ಥಃ, ತತಃ ಸರ್ವದಾ ಅಹಮಿತಿ ಸ್ಯಾತ್ , ನೈತಚ್ಛಕ್ಯಮ್ ; ಉಪಾಧಿಪರಾಮರ್ಶೇನ ಚೈತನ್ಯಮಹಮಿತ್ಯುಲ್ಲಿಖ್ಯತ ಇತಿ ವಕ್ತುಮ್ ; ತತ್ಪರಾಮರ್ಶೋ ಹಿ ತತ್ಸಿದ್ಧಿನಿಮಿತ್ತಃ, ನ ಸ್ವರೂಪಸಿದ್ಧಿಹೇತುಃ ಸ್ವಮಾಹಾತ್ಮ್ಯೇನೈವ ತು ಸ್ವರೂಪಸಿದ್ಧಿಃ । ತತಶ್ಚ ವಿಷಯೋಪರಾಗಾನುಭವಾತ್ಮತ್ವಶೂನ್ಯಃ ಸ್ವರೂಪತಃ ಅಹಮಿತಿ ಸುಷುಪ್ತೇಽಪ್ಯವಭಾಸೇತ ; ದೃಶಿರೂಪತ್ವಾವಿಶೇಷಾತ್ । ಭವತ್ಯೇವೇತಿ ಚೇತ್ , ನ ; ತಥಾ ಸತಿ ಸ್ಮರ್ಯೇತ ಹ್ಯಸ್ತನ ಇವಾಹಂಕಾರಃ । ಅವಿನಾಶಿನಃ ಸಂಸ್ಕಾರಾಭಾವಾತ್ ನ ಸ್ಮರ್ಯತೇ ಇತಿ ಚೇತ್ , ಹ್ಯಸ್ತನೋಽಪಿ ನ ಸ್ಮರ್ಯೇತ ॥
ಜಾಗ್ರದವಸ್ಥಾಯಾಮಹಮಿತಿ ಪ್ರತೀಯಮಾನಂ ಚಿನ್ಮಾತ್ರಮೇವ । ತತ್ಸುಷುಪ್ತಾವಪ್ಯನುಭೂಯತ ಏವ । ಅತೋಽಹಮಿತಿ ಪ್ರತಿಪನ್ನೇ ಕಿಂಚಿತ್ಸುಪ್ತಾವನನುಭೂತಂ ನಾಸ್ತೀತಿ ಚೋದಯತಿ -
ನ ತ್ವಹಮಿತಿ ।
ಭೋಕ್ತೃತ್ವಮಿತಿ ।
ಭೋಕ್ತೃತ್ವಶಬ್ದೇನ ಚಿನ್ಮಾತ್ರಮುಚ್ಯತೇ,
ಜಾಗ್ರತ್ಯಹಮಿತಿ ಪ್ರತಿಪನ್ನಚಿನ್ಮಾತ್ರಸ್ಯ ಸುಷುಪ್ತಾವವಭಾಸೇಽಹಮಿತ್ಯವಭಾಸಃ ಸ್ಯಾತ್ ಇತ್ಯಾಶಂಕ್ಯ ನೀಲಾದಿಸಂಬಂಧಾಖ್ಯವಿಷಯಾನುಭವಾಭಾವಾನ್ನಾಹಮಿತಿ ಪ್ರತಿಭಾಸಪ್ರಸಂಗಃ ಸುಷುಪ್ತ ಇತ್ಯಾಹ -
ತದಭಾವೇ ಕಥಮಿತಿ ।
ಜಾಗ್ರತ್ಯಹಮಿತಿ ಪ್ರತೀತಂ ಚಿನ್ಮಾತ್ರಂ ಚೇತ್ ಸುಷುಪ್ತಾವಪಿ ಪ್ರತೀಯಮಾನಮಹಮಿತಿ ಪ್ರತೀಯಾದಿತ್ಯಾಹ -
ನೈತತ್ ಸಾರಮಿತಿ ।
ಉಪಾಧಿಪರಾಮರ್ಶ ಇತಿ ।
ಚೈತನ್ಯಸ್ಯ ನೀಲಾದಿವಿಷಯೋಪರಾಗೇ ಸತೀತ್ಯರ್ಥಃ ।
ತತ್ಪರಾಮರ್ಶೋ ಹಿ ತತ್ಸಿದ್ಧಿನಿಮಿತ್ತ ಇತಿ ।
ನೀಲಾದ್ಯುಪರಾಗೋ ನೀಲಾದಿಸಿದ್ಧಿಹೇತುರಿತ್ಯರ್ಥಃ ।
ನ ಸ್ವರೂಪಸಿದ್ಧಯೇ ಹೇತುರಿತಿ ।
ಸಿದ್ಧಿಹೇತುರಿತ್ಯರ್ಥಃ ।
ಸ್ವಮಾಹಾತ್ಮ್ಯೇನೈವ ತು ಸ್ವರೂಪಸಿದ್ಧಿರಿತಿ ।
ಸ್ವಯಂಪ್ರಕಾಶತಯಾ ಚಿದ್ರೂಪಾತ್ಮಸಿದ್ಧಿರಿತ್ಯರ್ಥಃ ।
ದೃಶಿಸ್ವರೂಪತ್ವಾವಿಶೇಷಾದಿತಿ ।
ಸುಷುಪ್ತೌ ಪ್ರತೀತಚಿದ್ರೂಪಸ್ಯ ಜಾಗ್ರತ್ಯಹಮಿತಿ ಪ್ರತೀತಚಿದ್ರೂಪಸ್ಯ ಚೇತ್ಯರ್ಥಃ ।
ಉತ್ತ್ಥಿತಸ್ಯಾಹಉತ್ಥಿತಃ ಸ್ಯಾಮಿತಿಮಿತ್ಯುತ್ಪನ್ನಾ ಪ್ರತೀತಿಃ ಸುಷುಪ್ತಾವನುಭೂತಾಹಂಕಾರಸ್ಯ ಸ್ಮರಣಮಿತಿ ನೇತ್ಯಾಹ -
ಹ್ಯಸ್ತನ ಇವೇತಿ ।
ಪೂರ್ವಸ್ಮಿನ್ ದಿನೇ ಅಹಮಿತ್ಯಭಿಮನ್ಯಮಾನ ಏವಾಸಮಿತಿ ಸ್ಮರ್ಯಮಾಣವದಿತ್ಯರ್ಥಃ ।
ಅವಿನಾಶಿನಃ ಸಂಸ್ಕಾರಾಭಾವಾದಿತಿ ।
ಸಂಸ್ಕಾರಸಾಧಕಾತ್ಮಚೈತನ್ಯಸ್ಯಾವಿನಾಶಾನ್ನ ಸಂಸ್ಕಾರಜನ್ಮೇತ್ಯರ್ಥಃ ।