కుసుమగతమేవ సత్యలౌహిత్యం స్ఫటికాదవివిక్తం భాతీత్యఖ్యాతివాదీ చోదయతి -

కథం పునరితి ।

ప్రతిస్ఫాలితా ఇతి ।

స్ఫాటికస్య తేజోద్రవ్యత్వాత్ తతః ప్రతిహతా యది జపాకుసుమం గచ్ఛేయురిత్యర్థః ।

తదేవ జపాకుసుమమేవ లోహితం గృహ్ణాతీత్యాగృహ్ణన్తీతిశఙ్క్య, తర్హి సన్నివేశవిశిష్టం పుష్పం లోహితమితి గ్రాహ్యేయురిత్యాహ –

విశిష్టసన్నివేశమితి ।

దోషబలాదిన్ద్రియస్య కుసుమసంయోగాభావాత్ న సన్నివేశగ్రహణమితి, నేత్యాహ -

న హి రూపమాత్రనిష్ఠ ఇతి ।

రూపమాత్రం స్ఫటికే ప్రతిబిమ్బితం స్ఫటికాత్మనా భాతీత్యన్యథాఖ్యాతివాదీ వదతి, తన్నేత్యాహ -

నాపి స్వాశ్రయమితి ।

లౌహిత్యగుణాశ్రయద్రవ్యప్రభావద్ద్రవ్యస్య స్ఫటికే వ్యాప్త్యఙ్గీకారాత్ తద్ద్వారేణాగతం రూపం స్ఫటికాత్మనా భాతీతి చోదయతి -

నన్వభిజాతస్యేవేతి ।

కులీనస్యాసఙ్కరస్యేత్యర్థః ।

స్ఫటికసంసృష్టం లౌహిత్యం సంసర్గస్య మిథ్యాత్వాత్ తద్విశిష్టరూపేణ మిథ్యేత్యాహ -

తథాపి స్వయమలోహిత ఇతి ।

లౌహిత్యస్య న స్ఫటికసంసర్గావభాస ఇత్యఖ్యాతివాదినో మతం దదాతి -

అథ ప్రభైవేతి ।

శౌక్ల్యమపి తర్హీతి ।

సంయుక్తసమవాయస్య సంయోగస్య వా విద్యమానత్వాదితి భావః ।

ప్రభయాపసారితమితి ।

లౌహిత్యాఖ్యవిరోధిగుణయా ప్రభయేత్యర్థః ।

రూపిద్రవ్యసంయోగాదితి పం౦ పాం౦న రూపిసంయోగాదితి ।

రూపిప్రభాసంయోగానాం న చాక్షుషత్వమిత్యర్థః ।

'జపాకుసుమం ప్రభావత్ రక్తత్వాత్ పద్మరాగాదివత్’ ఇత్యాశఙ్క్యాహ -

యథా పద్మరాగాదిప్రభేతి ।

నిరాశ్రయపీతిమాశ్రయమణ్యవచ్ఛేదకదేశాద్దేశాన్తరం వ్యాప్య మాం ప్రతి సమాగచ్ఛతీతి ప్రతీయత ఇత్యర్థః ।

అహఙ్కారోపరాగ ఇత్యత్ర ఆత్మని కర్తృత్వాద్యనర్థారోపహేతురిత్యధ్యాహారః । నాహఙ్కారస్యానర్థహేతుత్వం ‘భిద్యతే హృదయగ్రన్థిము౦ ఉ౦ ౨ - ౨ - ౯’ రితి హృదయగ్రన్థేరనర్థహేతుత్వస్య శ్రుత్యవగతత్వాదితి తత్రాహ -

తతః సమ్భిన్న ఇతి ।