నాశసమ్భావనాయై వృక్షరూపకం బన్ధహేతోః దర్శయతి -
ఊర్ధ్వమూలమితి ।
కథం కాలతః సూక్ష్యత్వమ్ ? తదాహ -
కారణత్వాదితి ।
తదేవ కథం? కార్యాపేక్షయా నియతపూర్వభావిత్వాత్ , ఇత్యాహ -
నిత్యత్వాదితి ।
సర్వవ్యాపిత్వాచ్చ ఉత్కర్షం సమ్భావయతి -
మహత్వాచ్చేతి ।
ఊర్ధ్వం - ఉచ్ఛ్రితం - ఉత్కృష్టమ్ ఇతి యావత్ ।
తస్య కూటస్థస్య కథం మూలత్వమ్ ఇత్యాశఙ్క్య, ఆహ -
అవ్యక్తేతి ।
స్మృతిమూలత్వేన శ్రుతిముదాహరతి -
శ్రుతేశ్చేతి ।
అవాఞ్చ్యః - నికృష్టాః, శాఖా ఇవ మహాదాద్యా యస్య, సః, తథా ప్రకృతే సంసారవృక్షే పురాణసంమతిమ్ ఆహ -
పురాణే చేతి ।