ಕಾರ್ಯಸ್ಯ ಅತ್ಯಂತಾಸತ್ತ್ವಾನಭ್ಯುಪಗಮಾತ್ ಕಾರಣಸಂಬಂಧಃ ಸ್ಯಾತ್ ಇತಿ ಶಂಕತೇ -

ನನ್ವಿತಿ ।

ಸತಾಮೇವ ದ್ವ್ಯಣುಕಾದೀನಾಂ ಕಾರಣಸಂಬಂಧಂ ಶಂಕಿತಂ ದೂಷಯತಿ -

ನ ಸಂಬಂಧಾದಿತಿ ।

ಅನಭ್ಯುಪಗಮಮೇವ ವಿಶದಯತಿ -

ನಹೀತಿ ।

ಸದೇವ ಕಾರಣಂ ಕಾರ್ಯಾಕಾರಮ್ ಆಪದ್ಯ ಕಾರ್ಯವ್ಯವಹಾರಂ ನಿರ್ವಹತಿ ಇತಿ ಅಭ್ಯುಪಗಮಾತ್ ನಾಸ್ತಿ ಸಂಬಂಧಾನುಪಪತ್ತಿಃ ಇತಿ ಆಶಂಕ್ಯ ಅಪರಾದ್ವಾಂತಾತ್ ಮೈವಮ್ ಇತ್ಯಾಹ -

ನ ಚೇತಿ ।

ಕಾರ್ಯಸ್ಯ ಕಾರಣಸಂಬಂಧಾತ್ ಪೂರ್ವಂ ಸತ್ತ್ವಾಭಾವೇ ಪರಿಶೇಷಸಿದ್ಧಮ್ ಅರ್ಥಂ ದರ್ಶಯತಿ -

ತತಶ್ಚೇತಿ ।

ತತ್ರ ಚ ಅನುಪಪತ್ತಿಃ ಉಕ್ತಾ ಇತಿ ಶೇಷಃ ।