बृहदारण्यकोपनिषद्भाष्यवार्तिकम्
॥ द्वितीयाध्यायस्य षष्ठं ब्राह्मणम् ॥
स्तुत्यर्थं ब्रह्मविद्याया ब्रह्मविद्वंश उच्यते ।।
जपोऽयं ब्रह्मविज्ञानजन्मने चोद्यते श्रुतौ ।। १ ।।
पुंमत्यूहोत्थिताशङ्कानिवृत्त्यर्थं यथोदितम् ।।
ब्रह्मज्ञानस्य वा वंशो यत्नाच्छ्रुत्याऽयमुच्यते ।। २ ।।
यस्यानुशासनं तस्य स्वयंभोः प्रतिपत्तये ।।
पौतिमाष्यादिको ग्रन्थः श्रुत्याऽथ प्रतिपाद्यते ।। ३ ।।
अग्रात्प्रभृति वंशोऽयमावेदब्रह्ममूलतः ।।
भिन्नहेतुनिषेधार्थं स्वयंभु ब्रह्म शब्द्यते ।। ४ ।।
यस्मादपरतन्त्रोऽयं वेदात्मा ब्रह्म भण्यते ।।
मनोवाक्कर्मभिस्तस्माद्भक्त्या तस्मै नमः सदा ।। ५ ।।
इति श्रीबृहदारण्यकोपनिषद्भाष्यवार्तिके द्वितीयाध्यायस्य षष्ठं ब्राह्मणम्
शतानि दश पञ्चैव श्लोकाः सप्तदशापरे ।।
श्लोकसंख्याऽत्र विज्ञेया चतुर्थाध्यायवार्तिके ।।
इति श्रीमत्परमहंसपरिव्राजकाचार्य श्रीसुरेश्वराचार्यविरचिते बृहदारण्यकोपनिषद्भाष्यवार्तिके द्वितीयोऽध्यायः