बृहदारण्यकोपनिषद्भाष्यवार्तिकम्
॥ पञ्चमाध्यायस्य चतुर्थं ब्राह्मणम् ॥
तस्यैव हृदयाख्यस्य ब्रह्मणोऽन्यदुपासनम् ।।
सत्योपाधिविशिष्टस्य तद्वै तदिति भण्यते ।। १ ।।
तच्छब्देन परामर्शो वैशब्दः स्मरणाय च ।।
प्रकारान्तरनिर्देशे तदासेति च तद्वचः ।। २ ।।
सत्यमेव तदासेति यदुक्तं हृदयात्मना ।।
मूर्तामूर्तात्मकं सत्यं ब्रह्म पूर्वं प्रपञ्चितम् ।। ३ ।।
महत्तत्परिमाणेन यक्षं पूज्यतमत्वतः ।।
अग्रजः प्रथमोद्भूतेस्तदन्यत्कार्यजन्मनः ।। ४ ।।
यः कश्चिदेतं व्याख्यातं वेदोपास्ते दिवानिशम् ।।
लोकाञ्जयति स सर्वाञ्शत्रुश्चास्य जितो भवेत् ।। ५ ।।
इति श्रीबृहदारण्यकोपनिषद्भाष्यवार्तिके पञ्चमाध्यायस्य चतुर्थं ब्राह्मणम्