बृहदारण्यकोपनिषद्भाष्यवार्तिकम्
॥ पञ्चमाध्यायस्य एकादशं ब्राह्मणम् ॥
उपास्त्यन्तरमस्यैव कौक्षेयाग्नेर्वपुर्भृतः ।।
अयमग्निरिति श्रुत्या यत्नेनाथ विधीयते ।। १ ।।
वैश्वानरग्निराऽस्याग्नेः सामान्येनाभिधानतः ।।
योऽयमन्तरितीत्युक्त्या तद्विशेषणमुच्यते ।। २ ।।
तस्याग्नेरेष घोषः स्यात्कर्णौ प्रोर्णूय यच्छ्रुतिः ।।
उपास्यार्थस्य साक्षात्त्वं घोषरूपेण वर्ण्यते ।। ३ ।।
अरिष्टदर्शनं चात्र प्रासङ्गिकमथोच्यते ।।
नैनं घोषं शृणोतीति प्रत्यासन्नमृतिर्नरः ।। ४ ।।
इति श्रीबृहदारण्यकोपनिषद्भाष्यवार्तिके पञ्चमाध्यायस्यैकादशं ब्राह्मणम्