आनन्दगिरिटीका (छान्दोग्य)
सप्तमोऽध्यायः: तृतीयः खण्डः
मनःशब्दस्य वृत्तिमात्रविषयत्वं व्यावर्तयति –
मन इति ।
कथं तस्य वाचो भूयस्त्वं तदाह –
तद्धीति ।
वाचो मनस्यन्तर्भावेऽपि कुतो मनसस्तस्या भूयस्त्वं तत्राऽऽह –
यच्चेति ।
मनसो वागादेर्व्याप्तिं दृष्टान्तेन स्पष्टयति –
यथेत्यादिना ।
इतश्च मनसोऽस्ति भूयस्त्वमित्याह –
यदेति ।
विवक्षाबुद्धिस्तां करोतीति शेषः । इच्छेयेतीच्छां कृत्वेति शेषः ।
तस्याऽऽत्मत्वमुपपादयति –
आत्मन इति ।
तस्य लोकत्वं साधयति –
सत्येवेति ॥१॥
इति श्रीमदानन्दगिरिटीकायां सप्तमाध्यायस्य तृतीयः खण्डः ॥