भाष्यरत्नप्रभाव्याख्या
इतरासंश्लेषाधिकरणम्
इतरस्यापि तु ।
अतिदेशत्वान्न सङ्गत्याद्यपेक्षा ।
ज्ञानात्पुण्यं क्षीयते न वेति पूर्ववत्सन्देहे ज्ञानं तु न पुण्यनाशकं शास्त्रीयत्वात्पुण्यवदित्यधिकाशङ्कामुक्त्वातिदेशं व्याचष्टे -
धर्मस्येत्यादिना ।
ज्ञानं पुण्यनाशकं समूलविद्याघातित्वादिति न्यायोपेतागमबाधितमनुमानमिति भावः ।
ननु क्षीयन्ते चेत्यविशेषश्रुतिः पापविषया सर्वं पाप्मानं तरतीति विशेषश्रुतेरित्यत आह -
यत्रापि केवल इति ।
पापपुण्यक्षयपराधिकरणद्वयस्य फलमाह -
पाते त्विति ॥१४॥